Matatar Dangote ta ƙara hawan danyen mai da take tacewa zuwa ganga 700,000 a rana, bayan wani gwajin aiki da masu tsara fasahar matatar suka gudanar. Wannan ya zarce ƙarfin da aka fara da shi a matatar na ganga 650,000 a rana, tare da ƙara tabbatar da matsayinta a matsayin mafi girman matatar mai mai layi guda a duniya.
Mataimakin shugaban sashin mai da iskar gas na rukunin kamfanonn Dangote, Devakumar Edwin, ya ce wannan ci gaba na cikin shirin ƙara ƙarfin matatar zuwa ganga miliyan 1.4 a rana cikin watanni 30 masu zuwa. Ya ce hakan zai taimaka wa Nijeriya wajen rage dogaro da shigo da man fetur daga ƙasashen waje tare da ƙarfafa matsayin ƙasar a kasuwar makamashi ta Afrika.
Tun bayan fara samar da man fetur a shekarar 2024, matatar ta ci gaba da ƙara yawan samar da fetur, da dizal, da man jiragen sama da sauran kayayyakin man fetur. Haka kuma tana fitar da kayayyakin zuwa ƙasashe da dama a Afrika, da Turai, da Amurka da Gabas ta Tsakiya.
Ana sa ran faɗaɗa ayyukan matatar zai samar da ƙarin guraben aiki, da bunƙasa masana’antu da ƙara kuɗaɗen shiga ga tattalin arziƙin Nijeriya, tare da tabbatar da wadataccen LPG da sauran kayayyakin da ake amfani da su wajen sarrafa kayayyakin masana’antu.
