Gwamnan jihar Yobe, Mai Mala Buni, ya ce, sakamakon sabbin nadin hafsoshin tsaro da shugaban kasa, Bola Tinubu, ya yi alama ce ta kawo karshen matsalolin tsaro da suka addabi mutane a Nijeriya.
Buni, ya ce, da nadin sabon mashawarci kan harkokin tsaro, Malam Nuhu Ribadu, akwai kwarin guiwar zai yi amfani da kwarewarsa da gogewarsa wajen yakar matsalolin tsaro a Nijeriya.
- Buni Ya Zabtare Kaso 35 Na Farashin Shaguna A Sabbin Kasuwannin Yobe
- Mai Mala Buni Ya Bayar Da Umarnin Sakin Yaron Da Ya Ci Zarafinsa
Gwamnan ya bayyana haka a wata sanarwa da daraktan yada labaransa, Mamman Mohammed, ya fitar.
“Shugabannin hukumomin tsaro su na da cikakkiyar kwarewa kuma da gwarin guiwar ‘Yan Nijeriya za su samu nasarar dakile matsalar tsaro.”
Sanarwar ta ce, a matsayinsu na daya daga cikin jihohin da suka sha fama da matsalar tsaro, gwamnan ya jinjina wa gwamnatin tarayya da jami’an tsaro kan nasarorin da suka cimma a jihohin da suke fuskantar kalubalen tsaro.
Gwamnan ya kara da cewa da yunkurin masu ruwa da tsaki da azamar sabbin hafsoshin tsaron akwai kyakkyawar fatan nan gaba kadan matsalolin rashin tsaro za su zama tarihi.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
