Dangane da koma bayan tsadar rayuwa sakamakon faduwar darajar naira da kuma matsanancin hauhawar farashin kayayyaki, ‘yan Nijeriya sun rage kashe kudaden da suke kashewa kan yawo a jiragen sama domin zuwa kasashen waje da kashi 30 cikin 100 zuwa dala biliyan 2.66 a shekarar 2024.
Masana harkokin sufurin jiragen sama sun danganta wannan lamarin da faduwar darajar naira da kashi 244 zuwa naira 1,553.73 a shekarar 2024 daga naira 450.71 a kowacce dala a farkon shekarar 2023, da kuma hauhawar farashi zuwa kashi 34.8 cikin 100 a shekarar 2024 daga kashi 21.34.
- Nijeriya Ce Ta 3 A Manyan Kasashe Masu Karfin Masana’antu 10 Na Afirka
- Gobara Ta Ƙone Wani Gidan Mai A Legas
Sun kuma ba da misali da tsauraran dokokin shige da fice a kasashen da suka ci gaba suka sanya da kuma cire Nijeriya daga E-bisa da wasu kasashe suka yi, lamarin da ya rage yawan ‘yan Nijeriya da ke son yin ‘japa’ wato yin hijira daga kasar.
Kazalika, tashin kudin tikitin jirgi da aka samu sakamakon rashin dajarar naira ya kara kashe guiwa wasu na zuwa yawo kasashen ketare.
Alkaluman da babban bankin kasar (CBN) ya fitar sun nuna cewa, kashe kudaden yawon kan zirga-zirgar jiragen sama na kasashen waje ya ragu da kashi 18 cikin 100 a matakin shekara-shekara, zuwa dala biliyan 3.09 a shekarar 2023 daga dala biliyan 3.78 a shekarar 2022.
Lamarin ya ci gaba da raguwa har zuwa 2024, inda yawan kudaden da ake kashewa a yawon ketare ya fadi da kaso 14 a matakin shekara-shekara zuwa dala biliyan 2.66.
Hakan na nuni da cewa ‘yan Nijeriya sun rage kashe kudaden da suke kashewa kan safarar jiragen sama da dala biliyan 1.12 ko kuma kashi 30 cikin dari a cikin shekaru biyun.
