Wasu fusatattun mazauna kauyen Giyawa a karamar hukumar Goronyo ta jihar Sokoto, da safiyar ranar Lahadi sun hallaka wani mutum da ake zargi dan bindiga ne tare da kwato dabbobi sama da 150.
Rahotonni sun yi nuni da cewa, mazauna gundumar Giyawa, sun yi futo-na-futo da tawagar ‘yan bindigar da suka fito daga kauyen Samana a karamar hukumar Binji akan hanyarsu ta zuwa dajin Goronyo inda maboyarsu ta ke.
- ‘Yan Bindiga Sun Kashe Mutum 4, Sun Raunata 5 A Kaduna
- Gwamna Dauda Lawal Ya Yi Wa Matar Da ‘Yan Bindiga Suka Raba Da Muhallinta Shatara Ta Arziki
Hakan ya biyo bayan gajiya da ta’addancin da ‘yan bindigar ke yi wa al’ummar yankin.
Wata majiya, da ta nemi a saka ya sunanta, ta ce, ana zargin an kashe mutum hudu yayin da aka yi garkuwa da wasu mutum 18 da dabbobi da dama kwanakin baya a kauyen Giyawa.
Kazalika, ba a samu jin ta bakin mukaddashin kakakin ‘yansadan jihar Sokoto, ASP Ahmad Rufa’i ba har zuwa hada wannan rahoton.
