Naɗin Mustapha Kwankwaso a matsayin ɗan takarar mataimakin gwamnan Jihar Kano na jam’iyyar NDC ya haifar da ce-ce-ku-ce da kan mahaifinsa, Sanata Rabiu Musa Kwankwaso, inda da dama ke ganin matakin kuskure ne na siyasa gabanin zaɓen 2027.
Mustapha Kwankwaso shi ne babban ɗan tsohon gwamnan Kano kuma mataimakin ɗan takarar shugaban ƙasa na NDC, Rabiu Musa Kwankwaso.
Naɗin nasa a ranar Litinin a matsayin mataimakin Aminu Abdussalam Gwarzo ya biyo bayan murabus ɗin da ya yi a watan Janairu daga muƙaminsa na Kwamishinan Matasa da Wasanni a gwamnatin gwamna Abba Kabir Yusuf.
Masu sukar matakin sun zargi Kwankwaso da ƙoƙarin kafa siyasar gado ta iyali, suna masu cewa hakan ya saɓa wa akidar siyasar Kwankwasiyya da aka daɗe ana yabawa da tsayawa kan adalci da bai wa kowa dama.
Sun yi nuni da cewa an yi watsi da wasu manyan jiga-jigan Kwankwasiyya da suka daɗe suna hidima ga tafiyar siyasar, ciki har da Shehu Sagagi, Rufa’i Hanga, da Lamin Baffa, domin bai wa ɗansa wannan dama.
A cewarsu, matakin na iya janyo rashin jin daɗi a tsakanin magoya bayan NDC da Kwankwasiyya a matakin ƙasa, musamman a yankunan da suka kasance ginshiƙin goyon bayan tafiyar.
Haka kuma, wasu masu sharhi kan harkokin siyasa sun bayyana haɗa gogaggen ɗan siyasa kamar Aminu Abdussalam da matashin Mustapha Kwankwaso a matsayin babban caca ta siyasa, wadda sakamakonta zai iya tasiri ga damar jam’iyyar a zaɓen 2027.
Sai dai magoya bayan Kwankwaso suna ganin Mustapha yana da ƙwarewar siyasa da gogewar gwamnati da za su ba shi damar taka rawar gani a sabon muƙamin da aka ba shi.
