Kamfanin Man Fetur na Nijeriya (NNPC Ltd) ya sanya hannu kan wata sabuwar yarjejeniya da kamfanoni biyu na ƙasar China domin hanzarta gyara da kuma farfado da matatun mai na Nijeriya, tare da buɗe damar haɗin gwiwar saka hannun jari na fasaha.
An kulla yarjejeniyar ne a matsayin da Sanjiang Chemical Company Limited da kuma Xingcheng (Fuzhou) Industrial Park Operation and Management Co. Ltd, wanda NNPC ta bayyana a matsayin “babban ci gaba” a ƙoƙarin sauya fasalin matatun man.
An rattaba hannu kan yarjejeniyar a birnin Jiaxing na ƙasar China ranar 30 ga Afrilu, 2026, ta hannun Shugaban Kamfanin NNPC Ltd, Bashir Bayo Ojulari, tare da Shugaban kamfanin Sanjiang, Guan Jianzhong, da kuma Shugaban Xingcheng Industrial Park, Bill Bi.
A cewar sanarwar da Babban Jami’in Sadarwa na kamfanin NNPC Ltd, Andy Odeh, ya fitar, yarjejeniyar za ta buɗe hanya ga yiwuwar haɗin gwiwar saka hannun jari na fasaha, wanda zai taimaka wajen kammala ayyukan da suka rage a matatun mai na Fatakwal da Warri, tare da tabbatar da dorewar aikinsu na dogon lokaci.
