Hukumar Samar da Wutar Lantarki a Karkara (REA) ta sanar da cewa ta rattaba hannu kan yarjejeniyar fahimtar juna (MoU) tare da Gwamnatin Jihar Jigawa, Nigerian Commodity Exchange (NCX) da kamfanin Astound Power Limited domin samar da wutar lantarki mai ƙarfin megawatt 7 (MW 7). An sanya hannu kan yarjejeniyar ne a yayin Taron Zuba Jari na Jigawa (J-Invest 2026), inda za ta tallafa wa haɗin gwuiwar gwamnati da kamfanoni masu zaman kansu a cibiyoyin masana’antun noma guda bakwai da ke jihohin Jigawa, da Taraba, da Kaduna, Kebbi, da Ekiti, da Osun da Ebonyi.
REA ta bayyana cewa, a ƙarƙashin yarjejeniyar za ta gina kayayyakin samar da wutar lantarki domin tallafa wa tsarin ban ruwa da cibiyoyin sarrafa amfanin gona. Haka kuma, NCX za ta riƙa bai wa manoma da masu tara amfanin gona da suka cika ƙa’idoji takardun shaidar ajiya na rumbunan ajiyar kayayyaki da ke ƙarƙashin tsarin NCX, domin sauƙaƙa fitar da amfanin gona zuwa ƙasashen waje.
Da yake jawabi yayin sanya hannu kan yarjejeniyar, Manajan Daraktan REA, Dakta Abba Aliyu, ya ce ingantacciyar wutar lantarki na daga cikin manyan abubuwan da ke jawo masu zuba jari, da bunƙasa masana’antu da kuma samar da ayyukan yi a Nijeriya. Ya bayyana cewa haɗa makamashi mai tsafta da aikin noma zai ƙara ƙarfafa samar da wadataccen abinci, da samar da ayyukan yi masu ɗorewa da kuma ƙara darajar tattalin arziƙin manoma da al’ummomin karkara.
Dakta Aliyu ya ƙara da cewa makamashi shi ne ginshiƙin ci gaban kasuwanci da bunƙasar al’umma, yana mai jaddada cewa zuba jari na bin inda ake da damarmaki da kuma amincewa da tsarin gwamnati.
Ya ce ɗaya daga cikin manyan saƙonnin da gwamnati za ta iya isarwa ga masu zuba jari shi ne nuna ƙudirin samar da yanayin da kasuwanci zai bunƙasa. Taron J-Invest 2026 ya haɗa masu tsara manufofi, da masu zuba jari, da abokan hulɗar ci gaba da shugabannin kamfanoni masu zaman kansu domin tattauna hanyoyin bunƙasa tattalin arziƙin Jihar Jigawa, yayin da Mataimakin Shugaban Ƙasa, Sanata Kashim Shettima, ya buɗe taron a hukumance.
