Shirye-shiryen farko na Ramadan ga Mata:
Ki tsaftace dakinki, ki dan canza tsarinsa kadan, ki yi masa tsabtacewa sosai. Ki wanke kayan Sallah da tabarmar Sallah, sannan ki sa musu kamshi, ki tanadi wani karamin kusurwa a dakinki domin ibada. Ko da wurin kankani ne ko ya matse, za a iya amfani da shi.
Ki ajiye kayan Sallah, tabarmar Sallah da Al-kur’ani a wannan kusurwa, ki rika yin Sallah da addu’a a wurin. Ya isa wannan wuri ya zama shaida a gareki a ranar Alkiyama.
Sannan ki samo akwati na ajiya, ki rubuta “Akwatin Sadakar Ramadan,” ki rika sa dan kudi a ciki kullum, ki yi amfani da shi wajen aikin alheri kamar sayen kayan Sallah ga yara ko ciyar da marayu a lokacin buda baki.
Kyakykyawar shawara: Ki rika rabon kayan buda bakiinki da iyali marasa karfi kowace rana. Ki kara abinci kadan, ki sanar da su cewa kayan buda bakinsu daga gare ki ne.
Ki zabi wata sura daga Alkur’ani da kike so kuma kike jin kusanci da ita, ki dauki alkawari ga Allah za ki haddace ta. Za ki samu lada mai yawa a wannan wata mai albarka.
Ki yawaita nema gafara ga Allah, ki sanya niyya daban-daban a istigfarinki, kamar rokon Allah ya ba ki ‘ya’ya nagari, sauki daga damuwa, ko duk wata bukata da yawa daga matsaloli an warware su ta hanyar istigfari.
Ki dauki mutum uku (’yan’uwa ko abokai) a addu’arki. Kowace rana ki yi addu’a ga mutane uku da sunayensu, ki kuma roke su su yi miki addu’a, za ki ga sakamako kafin karshen watan. Mala’iku na cewa: “Kuma a gare ki irinsa.”
Ki yi Hajj da Umrah kowane mako a Ramadan. Eh! Ki zabi rana ko ranaku a mako ki yi haka: ki yi Sallar Asuba, ki zauna a kan tabarmar Sallah, ki yi addu’a, zikiri, da karatun Alkur’ani har fitowar rana, sannan ki yi raka’a biyu. Wannan yana ba da ladan cikakken Hajji da Umara.
Ki yawaita karatun Alkur’ani, ki yi niyyar kammala shi sau uku a Ramadan. Ko da ba ki kai ga kammalawa ba, za ki samu lada bisa niyyarki. Kowane harafi lada goma ki yi tunanin yadda ladan ya karu a Ramadan! Ki yi amfani da wannan dama.
Ki rika ajiye dan kudi kullum, sannan duk bayan kwanaki goma ki ba maraya sadaka dan kudi kadan a kullum tare da manufa a wannan wata mai tsarki, ki sadaukar da shi ga wani buri da kike fatan cikawa.
Ki tsara jadawalin ibadarki na kanki, ki bar shi sirri tsakaninki da Allah.
