Shugaban Hukumar kula da Tashoshin Jiragen Ruwa ta Kasa NPA, Dakta Abubakar Dantsoho, ya bayyana kwarin guiwarsa cewa, Hukumar za ta cimma burinta na gudanar da ayyukanta a sa’oi 24, a daukacin Tashoshin Jiragen Ruwan Kasar.
A cewasa, Hukumar za ta iya ciyar da ayyukan na ta gaba ne, ta hanyar yin amfani da fasahar zamani a Tashoshin Jiragen Ruwan Kasar.
- Masana Sun Bayyana Yadda Yakin Neman Zaben 2027 Ke Barazana Ga Harkokin Tafiyar Da Gwamnati
- Amfani Da Karfin Gwamnati Kan ‘Yan Adawa Zai Jawo Wa Tinubu Illa A 2027 – Sule Lamido
Ya bayyana haka ne, a taro karo na biyar biyar na masana’antar JournalNG Port Industry da ya gudana a jihar Legas
Taken taron shi ne: Cike Gibi Domin A Cimma Gudanar Da Ayyuka a Sa’oi 24 A Tashar Jiragen Ruwa.
Dantsoho ya kara da cewa, hakan na daga cikin namjin kokarin da ake yi, na wanzar da tsarin PCS, a Tashoshin Jiragen Ruwa ta Kasar, musamman domin hakan, ya tafi kafada da kafada da na sauran kasashen duniya, ta hanyar kara habaka gasa a hada-hadar kasuwancin duniya.
Ya ci gaba da cewa, tuni aka fara gudanar da wasu manyan ayyukan a Tashoshin Jiragen Ruwan Kasar, musamman a ta Lekki da ta Tin Can Island.
Shugaban ya bayyana cewa, an kuma samar da kafar sadarwa ta zamani ga masu ruwa da tsaki a daukacin Tashoshin Jiragen Ruwan Kasar, domin a rinka yin musayar Data, har da lokacin da ya dace, a fara gudanar da aiki.
Ya sanar da cewa, idan an kammala wannan aikin, za su kara taimaka wa wajen kara inganta ayyukan Hukumar, na tsawon sa’oi 24.
Dantosho wanda Manajan Sashen Tashar da ke a jihar Legas Lawal Ibrahim ya wakilce shi a wajen taron ya bayyana cewa, Hukumar ta kuma yi hadaka da Rundunar Sojin Ruwa, Rundunar ‘Yansanda ta kasa da kuma Hukumar Kula da Tsaro da sufurin jiragen Ruwa ta Kasa NIMASA musamman domin a kara karfafa samar da tsaro da kuma bai wa ma’aikatan Hukumar kariya.
