Mukaddashin wakilin dindindin na kasar Sin a MDD Sun Lei, ya kirayi a karfafa sarrafa sabbin fasahohin zamani yadda ya kamata, don hana ’yan ta’adda, da masu tsattsauran ra’ayi, da ’yan aware damar yaduwa ta hanyar amfani da sabbin fasahohin zamani.
Sun Lei, ya bayyana hakan ne a jiya Laraba yayin taron kwamitin sulhu kan batun yaki da ta’addanci, inda ya ce kungiyoyin ta’addanci suna amfani da sabbin fasahohin zamani kamar yanar gizo, da AI, da jirage marasa matuki don ta da hankali, da daukar sabbin mambobi, da tattara kudade da kuma kaddamar da hare-hare, wanda hakan ke haifar da sabbin kalubale ga ayyukan yaki da ta’addanci.
Ya ce, bangaren Sin yana goyon bayan MDD, da al’ummun kasa da kasa a fannin inganta sarrafa sabbin fasahohin zamani, da karfafa tsarin tantance hadari da sa ido, don hana ta’addanci, da ayyukan ‘yan aware, da masu tsattsauran ra’ayi na addini su yadu ta amfani da sabbin fasahohin zamani.
Daga nan sai ya bukaci al’ummar kasa da kasa da su taimakawa kasashe masu tasowa a fannin inganta karfin yaki da ta’addanci.
Sun Lei, ya kuma bayyana cewa, bangaren Sin yana fatan inganta hadin gwiwa da dukkannin bangarori, a bangaren yaki da duk wasu nau’inkan ta’addanci da amfani da karfi, ta yadda za a bayar da gudunmawar a zo a gani mai kyau, don samar da duniya marar ayyukan ta’addanci. (Amina Xu)
