Dakarun sojojin Nijeriya sun samu nasarar daƙile wani harin ƴan ta’adda a Jihar Kaduna, inda suka ƙwace bindiga ƙirar AK-47 tare da alburusai bayan wata musayar wuta da maharan.
A cewar sanarwar da rundunar sojin ta fitar, dakarun sun fuskanci ƴan ta’addar ne bayan samun sahihan bayanan sirri kan shirinsu na kai hari, lamarin da ya sa sojojin suka yi musu kwanton-bauna tare da buɗe musu wuta, inda da dama daga cikinsu suka tsere da raunukan harbi.
Sanarwar ta bayyana cewa a yayin aikin binciken yankin da arangamar ta auku a Kaduna, dakarun sun yi nasarar gano bindiga ƙirar AK-47 ɗauke da alburusai da sauran kayan aiki da maharan suka watsar domin tsira da rayukansu.
Rundunar sojin ta yaba da ƙwazo da jarumtar dakarun da suka gudanar da aikin, tana mai jaddada aniyar ci gaba da kai sumame a maɓoyar ƴan ta’adda a faɗin jihar domin dawo da cikakken zaman lafiya da kare al’umma.
Daga ƙarshe, rundunar ta buƙaci mazauna yankin da su ci gaba da ba jami’an tsaro haɗin kai tare da gaggauta kai rahoton duk wani wanda aka gani da raunin harbi ko kuma wani motsi da ba a aminta da shi ba a asibitoci da cikin al’umma.
