Dakarun Operation Haɗin Kai sun daƙile yunƙurin wasu da ake zargin ‘yan Boko ne na karɓar haraji ba bisa ƙa’ida ba daga hannun jama’ar wasu sassan Jihar Yobe.
Rundunar sojin ta ce ta samu bayanan sirri cewa ‘yan ta’addan na tafiya cikin motoci ƙirar Volkswagen Golf guda biyu da kuma babura domin karɓar kuɗaɗe daga mazauna yankin.
A ranar 19 ga watan Yuli, dakaru daga Forward Operating Base (FOB) Bukarti, tare da haɗin gwiwar 27 Task Force Brigade, sun kai farmaki a yankin Paya Kafiya.
Da isar sojojin, an yi musayar wuta tsakanin ɓangarorin biyu.
Rundunar sojin ta ce an lalata ɗaya daga cikin motocin ƙirar Volkswagen Golf da ‘yan ta’addan ke amfani da ita, sannan direban motar ya mutu.
Sauran mutane huɗu da ake zargin ‘yan ta’adda ne sun tsere zuwa cikin daji bayan sun samu raunukan harbin bindiga, inda suka bar motar a wajen.
Bayan haka, sojojin sun yi bincike a yankin tare da ƙwato motar da aka bari da kuma wasu kayayyaki da suka haɗa da alburusai 25 na PKT, bindiga ƙirar AK-47 cike da alburusai.
Rundunar sojin ta ce wannan aiki na daga cikin ci gaba da ƙoƙarin da ake yi na daƙile ayyukan ‘yan ta’adda, katse hanyoyin samar musu da kayayyaki da kuma hana su samun kuɗaɗen da suke amfani da su wajen gudanar da hare-hare a yankin Arewa maso Gabas.
