Rundunar Sojin Nijeriya ta ce dakarunta sun kashe sama da ’yan ta’addan ISWAP 25 da suka kai wani “hare-hare da dama daga sassa daban-daban” a Kukawa, Jihar Borno.
A cikin wata sanarwa da ta fitar ranar Laraba, Mukaddashin Jami’in Yaɗa Labarai na Hedikwatar Rundunar Haɗin Gwiwa ta Arewa maso Gabas, Operation Hadin Kai, Mohammed Goni, ya ce wasu sojoji ma sun rasa rayukansu yayin arangamar.
Sanarwar ta ce ’yan ta’addan ISWAP sun kai wa dakarun Bataliyar Sojoji ta Musamman ta 101 hari da dimbin mayaka daga ɓangarori huɗu, amma sojojin sun yi musu turjiya tare da mayar da martani mai ƙarfi ta hanyar amfani da manyan makamai, dabarun yaƙi da kuma kyakkyawan haɗin gwiwa a fagen daga.
Ta ce tallafin rundunar sojin sama ya taimaka wa dakarun wajen fatattakar ISWAP, inda aka kashe da dama daga cikinsu tare da tilasta wa waɗanda suka tsira tserewa a firgice.
“Binciken farko ya nuna cewa an kashe sama da ’yan ta’adda 25, yayin da zuwa yanzu aka gano gawarwaki 14,” in ji sanarwar.
Sai dai rundunar ta ce wasu daga cikin jaruman sojojin Nijeriya sun rasa rayukansu yayin arangamar.
Da yake jajantawa iyalan sojojin da harin ISWAP ya yi sanadin mutuwarsu, Goni ya ce: “Jarumtarsu, sadaukarwarsu da kuma kishin aikinsu za su kasance abin tunawa na dindindin game da hidimar da suka yi wa ƙasa.”
