Dakarun Sojojin Nijeriya sun kashe wasu mutane biyu da ake zargi da garkuwa da mutane, sun ceto wani mutum da aka sace, sannan sun kwato Naira miliyan 10 da aka biya a matsayin kuɗin fansa a dajin Falgore da ke Ƙaramar Hukumar Doguwa ta Jihar Kano.
Dakarun Birged ta Uku ne suka gudanar da aikin a ƙarƙashin Operation MESA, bayan sace Alhaji Kabiru Aliyu a ƙauyen Fanyabo da ke cikin dajin Falgore a ranar 11 ga Oktoba, 2026.
A cikin wata sanarwa da Mataimakin Daraktan Hulɗa da Jama’a na Sojoji na Birged ta Uku, Manjo Babatunde Zubairu, ya fitar a ranar Asabar, ya ce an sace Aliyu ne lokacin da yake dawowa daga Kasuwar Yandoka da ke Jihar Kaduna da tsakar dare.
Sanarwar ta bayyana cewa bayan sace shi, masu garkuwar sun tuntubi iyalansa da ke ƙauyen Yan Taburmi, shi ma a cikin dajin Falgore, inda suka buƙaci a biya kuɗin fansa domin sakin sa.
Bisa ga sanarwar, dakarun sojojin sun samu sahihan bayanan sirri game da lamarin, sannan suka shirya kwanton-ɓauna tare da haɗin gwiwar ’yan sanda, Hukumar Tsaro ta Farin Kaya (DSS) da mafarautan yankin.
Sanarwar ta ce aikin ya yi nasarar kashe mutane biyu da ake zargi da garkuwa da mutane tare da ceto wanda aka sace, yayin da sauran mambobin ƙungiyar suka tsere zuwa cikin dajin Falgore.
Ta ƙara da cewa bayan haka, dakarun sun gudanar da bincike a yankin, inda suka gano Naira miliyan 10 da ake zargin iyalan wanda aka sace sun biya a matsayin kuɗin fansa.
Sanarwar ta ce an mayar da kuɗin ga wanda aka ceto da iyalansa.
Kwamandan Birged ta Uku, Birgediya-Janar Saka Jimoh, ya yaba wa dakarun bisa jajircewarsu, ƙwarewa da kuma ƙwazon da suka nuna yayin gudanar da aikin.
Jimoh ya sake jaddada aniyar rundunar na ci gaba da matsa lamba kan masu aikata laifuka da kuma hana sake samun barazanar tsaro a yankin.
Ya kuma yi kira ga al’umma da su riƙa bayar da sahihan bayanai ga hukumomin tsaro a kan lokaci, domin taimakawa ƙoƙarin tabbatar da zaman lafiya da tsaro a Jihar Kano.
