Kwamitin Yaƙin Neman Zaɓen Shugaban Ƙasa na Jam’iyyar ADC ya mayar da zazzafan martani ga ɗan takarar mataimakin shugaban ƙasa na Jam’iyyar NDC, Sanata Rabiu Musa Kwankwaso, inda ya buƙace shi da ya fito fili ya bayyana komawarsa Jam’iyyar APC mai mulki a idan har yana tare da manufofinta.
Wannan martani na zuwa ne a Abuja biyo bayan kalaman da Kwankwaso ya yi a daren Lahadi, inda ya zargi ADC da ƙulla maƙarƙashiyar ruɗar da al’umma cewa tikitinsu na NDC zai janye wa Alhaji Atiku Abubakar a babban zaɓen 2027.
A cikin wata sanarwa da kwamitin kamfen ɗin na Atiku ya fitar, ya zargi Kwankwaso da zama ɗan amshin-shatan jam’iyya mai mulki da ke aiki a ɓoye domin raba ƙuri’un ƴan adawa domin APC ta samu nasara.
Sanarwar ta bayyana cewa duk wani ɗan adawa na gaskiya ya kamata ya rungumi haɗin kai domin ceto ƴan Nijeriya daga matsin tattalin arziƙi da rashin tsaron da gwamnatin Tinubu ta jefa ƙasar a ciki, maimakon nuna son kai da ƙaddamar da hare-hare kan sauran ƴan adawa.
Haka kuma, kwamitin ya ƙalubalanci Kwankwaso da ya daina yaudarar magoya bayansa da sunan ɗan adawa a ƙarƙashin NDC, yana mai nuni da cewa yadda yake mayar da hankali wajen sukar Atiku Abubakar maimakon gwamnati mai ci babbar shaida ce da ke nuna ainihin inda biyayyarsa take.
Sun jaddada cewa tikitin takarar Atiku zai ci gaba da mayar da hankali kan bayyana hanyoyin magance tsadar rayuwa, rashin tsaro, da rashin aikin yi, ba tare da ɓata lokaci kan abin da suka kira dabarun raba kawuna ba.
Wannan sabuwar cacar-baki tsakanin manyan jam’iyyun adawar biyu na zuwa ne a daidai lokacin da ƴan Nijeriya ke nuna damuwa kan yadda rarrabuwar kawunan ƴan adawa ka iya sake buɗe wa APC hanyar samun nasara a 2027.
Duk da wannan taƙaddama, kwamitin yaƙin neman zaɓen na ADC ya buƙaci ƴan ƙasa masu buƙatar canji na gaskiya da su haɗa kai a ƙarƙashin inuwar takarar Atiku Abubakar a matsayin mafita mafi inganci ga ƙasar.
