Mai magana da yawun ma’aikatar harkokin wajen kasar Sin Mao Ning, ta ce kalaman da ake ji daga bangaren kungiyar tarayyar Turai ta EU, dangane da alakar cinikayya da kasar Sin, irinsu “Kawar da hadurra”, da “Rage dogaro”, da “Daidaita gibin cinikayya”, ba su da wata ma’ana illa kariyar cinikayya, kuma ba abun da za su haifar illa illata moriyar masu sayayya na Turai, da kara tsadar gudanar da ayyukan kamfanoni, kana daga karshe hakan zai raunata ikon gogayya na masana’antun Turai.
Mao Ning, ta bayyana hakan ne a Alhamis din nan, yayin da take martani game da kalaman da aka jiyo shugaban kungiyar gamayyar masana’antun Turai na yi a baya-bayan nan, cewa kungiyar EU na shirin fadada matakai na shawo kan rashin daidaiton cinikayya tsakanin kasashe membobin kungiyar da kasar Sin.
Jami’ar ta kara da cewa, kamata ya yi kungiyar EU ta yi karatun ta nutsu, dangane da alakar cinikayyarta da bangaren Sin, ta kuma martaba alkawarinta na gudanar da cinikayya marar shinge.
Mao Ning, ta kuma bayyana damuwa dangane da matakin majalisar dokokin Japan, na kafa dokar majalisar tattara bayanan sirri ta kasa. Ta ce bisa tarihi, hukumar tattara bayanan sirri ta kasar Japan, ita ce ta taimaka wajen shimfida tushen amfani da karfin sojin Japan, da matakan kunna wutar yake-yake, kana ta yi kaurin suna wajen aikata muggan laifuka kan makwaftan kasar na Asiya, da ma al’ummar kasar ta Japan.
Don haka Mao ta yi kira ga shugabannin Japan da su koyi darussa daga tarihi, su kuma aiwatar da matakai bisa hangen nesa. (Saminu Alhassan)
