Yadda Abubakar Dantsoho Ke Bunƙasa NPA A Tsanake

Tun bayan naɗa shi a matsayin Manajan Darakta na Hukumar Kula da Tashoshin Jiragen Ruwa Ta Ƙasa a shekarar 2024, kaɗan ne suka yi hasashen irin gagarumin sauyin da zai kawo. Ba ɗan siyasa ne da aka kawo daga waje ba, sai dai ƙwararren masani ne a fannin sufurin teku wanda ya fara aiki da NPA tun a shekarar 1994 a matsayin ɗan yi wa ƙasa hidima (NYSC), inda ya ci gaba da hawa matakai a hankali tare da jajircewa halin da ya zama ginshiƙin shugabancinsa.

Kafin naɗin nasa, Dantsoho ya gaji wani tsari mai rikitarwa. Manyan tashoshin jiragen ruwa na Nijeriya, wato Apapa da Tin Can Island, an gina su tun shekaru da dama da suka wuce. Apapa ta cika shekara 100 a 2022, yayin da Tin Can ke kusan shekara 50 da kafuwa. Waɗannan tashoshi na kogin ruwa ne, ba su da zurfi sosai don karɓar manyan jiragen ruwa na zamani da ke mamaye harkokin kasuwancin duniya a yau. Haka kuma, wuraren sauke kaya (berths) sun tsufa, yayin da yawan kaya ya yi musu yawa.

• NANS Ta Kafa Kwamitin Ganin Yadda Ake Tafiyar Da Ayyukan TETFund
• Shugaban Majalisar Bayar Da Shawara Kan Harkokin Siyasa Ta Kasar Sin Ya Yi Kira Da A Raya Dangantakar Gabobi Biyu Na Mashigin Tekun Taiwan Cikin Lumana
• Ghana Za Ta Kai Ƙarar Canada Kotu Kan Hana Thomas Partey Shiga Ƙasar
• Sin Ta Zama Abin Koyi Na Sauyi Da Ci Gaba Ga Kasashe Da Dama, In Ji Shalva Papuashvili
• Garkuwa Da Mutane Na Barazana Ga Dalibai Miliyan 1.9 Masu Jarrabawar WAEC A Sassan Nijeriya

Salon aikinsa ya kasance mai tsari da nazari, wanda ya samo asali daga ƙwarewar da ya tara tsawon shekaru da kuma ci gaba da koyo. Ya fahimci cewa Nijeriya, mai yawan jama’a sama da miliyan 230 kuma mafi girman tattalin arziki a Afirka, na buƙatar tsarin tashoshin jiragen ruwa da ya dace da burinta na ƙasa.

Shirin da ya tsara ya haɗa da sabunta tsofaffin kayayyakin more rayuwa, gina sabbin tashoshin ruwa masu zurfi, da kuma amfani da sabbin fasahohin zamani na dijital. Ƙaddamar da aikin tashar jiragen ruwa ta Lekki Deep Seaport a Legas ya zama muhimmin ginshiƙi na wannan hangen nesa, wanda ke nuna sabon farfaɗowar harkar sufurin teku a Nijeriya.

Hangen nesan Dantsoho bai tsaya a Legas kaɗai ba. A yankin Neja Delta, inda tashoshin jiragen ruwa na Warri, Koko, Sapele da Burutu suka lalace tsawon shekaru, ya ƙaddamar da wani babban shiri na farfaɗo da su domin dawo da ƙarfinsu na aiki, inganta kayayyakin more rayuwa da kuma haɓaka tattalin arziki a yankin.

Jagorancinsa ya samu karɓuwa a matakin ƙasa da ƙasa. A watan Agustan 2025, an zaɓe shi a matsayin Mataimakin Shugaban nahiyar Afirka na International Association of Ports and Harbors, wanda ya sa ya shiga sahun gaba wajen tsara manufofin tashoshin jiragen ruwa a duniya.

Haka kuma, watanni kaɗan kafin hakan, ya zama ɗan Nijeriya na farko da ya shugabanci Ƙungiyar Gudanar da Tashoshin Jiragen Ruwa ta Yammaci da Tsakiyar Afirka, lamarin da ya ƙara tabbatar da matsayinsa a matsayin ƙwararre a fannin sufurin teku a yankin.

Duk da waɗannan lambobin yabo, ya ci gaba da mayar da hankali kan ci gaban cikin gida, inda ya samu jarin Dala biliyan 1.1 domin gyara tsofaffin tashoshin jiragen ruwa, tare da ƙulla haɗin gwiwa domin gina sabbin tashoshin ruwa masu zurfi a Badagry, Akwa Ibom da Calabar.

A ƙarƙashin jagorancinsa, Hukumar Kula da Tashoshin Jiragen Ruwa Ta Ƙasa ba kawai ta samar da ayyuka ba ne, har ma ta ɗaga matsayin inganci, sauri da ƙwarewa. Yayin da jiragen ruwa ke ƙara girma, aka zurfafa hanyoyin ruwa, kuma aka inganta tsarin aiki ta hanyar fasaha, tasirin Dantsoho ya fito fili wani fanni na sufurin teku da aka sake gina shi ba da hayaniya ba, sai dai da ƙoƙari mai ɗorewa da jajircewar mutum guda da ya sadaukar da rayuwarsa wajen kai tashoshin jiragen ruwan Nijeriya zuwa makoma mai albarka.