An zaɓi Dakta A’isha Mustapha a matsayin sabuwar Shugabar Ƙungiyar Likitocin Nijeriya (NMA), reshen Jihar Kaduna, bayan zaɓen da aka gudanar a makon da ya gabata.
Dakta A’isha ƙwararriyar likita ce a fannin mata da haihuwa, wadda ta yi fice wajen ƙwazo, nagarta da hidima ga harkokin kiwon lafiya. Kafin wannan sabon muƙami, ta samu lambobin yabo da dama, ciki har da karramawa daga Uwargidan Shugaban Ƙasa, Sanata Oluremi Tinubu, a wajen ƙaddamar da shirin PECCIN Launch 2025.
Haka kuma ta samu ‘Certificate of Eɗcellence in Peer Reɓiewing. daga Global Academy Publisher a shekarar 2024 da kuma Impact Award 2023 daga Oɓarian Cancer Coalition (Eɓery Woman Study).
A fannin ilimi ma Dakta A’isha ta samu nasarori da dama, ciki har da zama mafi ƙwarewa a cikin ɗalibi a jarabawar WACS Part I ta fannin Obstetrics and Gynaecology a shekarar 2015, sannan ta lashe kyautar Mafi Kyawun Malama daga ɗaliban likitanci na Jami’ar Ahmadu Bello a shekarun 2016 da2017.
Ta kuma kasance mafi kyawun ɗalibar da ta kammala karatu a fannin ‘Obstetrics and Gynaecology’ a ABU Zariya a shekarar 2008, tare da zama ‘Oɓerall Best Student’ a jarrabawar NECO daga Federal Goɓernment College Kano
Sabuwar shugabar ta bayyana cewa daga cikin abubuwan da za ta mayar da hankali a kai akwai kare haƙƙin likitoci, tabbatar da cikakken aiwatar da tsarin albashi da alawus-alawus na CONMESS, inganta walwalar likitoci, samar da tallafin lafiyar ƙwaƙwalwa, inganta inshorar lafiya, tabbatar da ingantattun lokutan aiki, ba da kariyar shari’a ga likitoci da kuma samar da ƙarin damar horaswa da ci gaban ƙwarewa.
A hirar da ta yi da wakilinmu, Dakta A’isha ta ce ta fito takara ne domin yin hidima ga likitoci da kuma tabbatar da adalci ga kowa ba tare da nuna bambanci ba.
Ta bayyana cewa ita ƴar asalin Jihar Kano ce, ta yi makarantar firamare a Hotoro, sannan ta halarci Federal Goɓernment College Kano kafin ta shiga Jami’ar Ahmadu Bello, Zariya, tana da kimanin shekaru 16 zuwa 17.
Ta ce tana zaune a Zariya, tana aure kuma Allah Ya albarkace ta da ƴaƴa uku. Ta fara aiki a Asibitin Koyarwa na Jami’ar Ahmadu Bello (ABUTH), Shika, inda har yanzu take aiki. Ta kuma halarci ƙasashe da dama domin ƙarin ilimi da ƙwarewa.
Kafin wannan nasara, Dakta A’isha ta taɓa zama Shugabar Ƙungiyar Likitoci Mata ta Nijeriya reshen Kaduna, sannan ta riƙe muƙamin Sakatariyar Ƙungiyar Likitocin Jihar Kaduna.
Da aka tambaye ta saƙon da take da shi ga abokan aikinta, ta ce tana godiya bisa amincewar da suka nuna mata, tare da ɗaukar alƙawarin kare haƙƙinsu da yin aiki da gaskiya da adalci.
Ta kuma yi kira gare su da su haɗa kai domin ci gaban ƙungiyar da inganta harkokin kiwon lafiya.
Game da yadda za ta tabbatar da adalci duk da bambancin addini da ƙabila a cikin ƙungiyar, Dakta A’isha ta ce NMA ƙungiya ce ta ƙwararru masu ilimi da sanin ya kamata, don haka za ta yi shugabanci ba tare da nuna son kai ba.
A ƙarshe, ta yi kira ga duk wanda yake da shawarar ci gaba da ya kawo ta, tana mai gode wa mijinta, iyalanta da duk waɗanda suka ba ta goyon baya wajen cimma wannan nasara. Ta yi addu’ar Allah Ya ɗaukaka Jihar Kaduna da Nijeriya baki ɗaya.
