Tsohon Sanatan Kaduna ta Tsakiya, Kwamared Shehu Sani, ya yi kira ga jihohin Arewa da gwamnatin tarayya da su tallafa tare da samar da kuɗaɗen gudanar da bikin al’adun Jami’ar Ahmadu Bello (ABU), yana mai bayyana bikin a matsayin wata muhimmiyar kafa ta inganta al’adu, yawon buɗe ido da kuma ƙarfafa martabar ƙasa.
Shehu Sani ya yi wannan kiran ne yayin da yake zantawa da manema labarai a lokacin bikin Durbar na shekara-shekara na ABUSRC da aka gudanar ranar Asabar, a matsayin wani ɓangare na bikin al’adun ABUSRC na shekara-shekara.
Baƙon na musamman ya yaba wa masu shirya bikin bisa yadda suka shirya gagarumin bikin mai kayatarwa, musamman yadda ɗalibai suka yi ƙoƙarin ingantawa tare da kiyaye al’adu da aƙidojin gargajiya na Nijeriya.
“Mun zo nan ne domin shaida bikin al’adu na majalisar Daluban ABU na shekarar 2026, wanda biki ne mai matuƙar kayatarwa. Ina matuƙar alfahari da burgewa ganin yadda matasanmu ke yin duk abin da za su iya wajen ingantawa da kare al’adunmu da kuma tsarin rayuwarmu na gargajiya,” in ji shi.
A cewarsa, al’ada ita ce ke wakiltar asali da ruhin al’umma, yana mai cewa abubuwan da aka nuna na al’adun gargajiya a wajen bikin sun burge shi matuƙa.
Ya kuma bayyana bikin a matsayin wani muhimmin ɓangare na bunƙasa harkokin yawon buɗe ido a Jihar Kaduna da Nijeriya baki ɗaya, inda ya buƙaci gwamnatoci su fahimci muhimmancinsa fiye da kasancewarsa kawai wani taron jami’a.
Shehu Sani ya kuma yaba wa masu shirya bikin bisa ƙoƙarinsu, inda ya ƙarfafa musu gwiwa da su ci gaba da gudanar da bikin tare da ƙara sabbin abubuwa masu ƙayatarwa da fasahohin zamani a kowace shekara.
An fara bikin al’adun ABUSRC na shekara-shekara ranar Alhamis, 13 ga Agusta, 2026, ƙarƙashin taken “Unity in Diɓersity: Celebrating Our Heritage, Strengthening Our Future”, wato “Haɗin Kanmu Cikin Bambance-Bambance: Murnar Gadonmu da Ƙarfafa Makomarmu.”
Bikin na kwanaki huɗu ya ƙunshi shirye-shiryen al’adu daban-daban, ciki har da gasar girki da ɗalibai daga jihohi da ƙabilu daban-daban ke wakilta.
Taron ya haɗa ɗaliban jami’ar, ma’aikata da baƙi domin nuna ɗimbin al’adu da tarihi na Nijeriya. An yi taron lafiya, an tashi lafiya.
