Wasu ‘yan bindiga sun yi garkuwa da tawagar ‘yan daurin aure akalla Mutum 50 a kan hanyar dawowar su daga Sokoto zuwa Zamfara.
Daga cikin ‘yan bikin akwai ‘yan kasuwar waya dake filin wasa na Bebeji, Gusau.
An yi Garkuwa da sune bayan halartar daurin auren abokin kasuwancinsu da akayi a jihar Sokoto, lamarin ya faru ne a tsakanin hanyar Tureta zuwa Bakura da misalin karfe 6 na yammacin ranar Asabar.
Motocin da aka tsare, dauke da tawagar daurin auren sun hada da wata mota kirar Toyota Camry oaster bas mallakin hukumar kula da ilimin bai daya ta kasa (UBEC) da motar ma’aikatan sakatariyar karamar hukumar Gusau da wasu motoci masu zaman kansu guda biyu.
Sakataren kungiyar masu saida waya ta jihar Zamfara, Ashiru Zurmi, yayin da yake bayyanawa manema labarai afkuwar lamarin a Gusau a ranar Lahadi, ya ce daya daga cikin motocin tawagar, ta samu matsala a Tureta da ke jihar Sokoto, sai abokan tafiyar suka tsaya har aka gyara motar.
Ya ce ‘yan bindigar sun yi wa motocin kwanton bauna ne bayan sun gyara motar da ta lalace a kan hanyar Tureta zuwa Bakura kuma an yi garkuwa da mutane sama da 50.
