Wani mutum mai suna Ojo Babatunde, ya shiga hannun jami’an ‘yan sanda a jihar Ekiti bisa zarginsa da yi wa agolarsa mai shekaru 15 fyade tare da dirka mata ciki.
An kama Babatunde ne a Omuo Ekiti, hedkwatar karamar hukumar Ekiti ta Gabas a jihar.
Jami’in hulda da jama’a na rundunar ‘yan sandan jihar Ekiti, DSP Sunday Abutu, a wata sanarwa a ranar Laraba, ya ce jami’an hukumar kare hakkin yara (JWC) ta jihar ce suka kai karar magidancin.
Yarinyar an Rahoto cewa tana dauke da Juna-biyu na tsawon watanni hudu, ta yi ikirarin cewa ya dade yana mata fyade kafin samun juna-biyun.
Ta bayyana cewa mijin mahaifiyarta ya fara yi mata fyade ne lokacin da mahaifiyarta ta haihu ta hanyar yi mata tiyata a asibiti, wannan yasa ta zauna a gida tare da shi na tsawon Makonni Uku.
A cewarta, yakan kwana da ita a gida a duk lokacin da mahaifiyarta ba ta kusa da ita kuma a lokuta da yawa yakan tafiya da ita gona yayi lalata da ita tare da yi mata barazanar cewa in ta tona asiri za ta fuskanci hukunci.
A cewar rundunar ‘yan sandan, tace, wanda ake zargin, ya tabbatar da zargin da ake yi masa inda yace aikin shedan ne.
Abutu ya ce za a gurfanar da wanda ake zargin a Kotu kan laifin da ya aikata.
