Rundunar ‘Yansandan Jihar Adamawa ta kama wasu mutum biyu da ake zargi da jagorantar wata kungiyar damfara da ke yaudarar kwastomomi ta hanyar sayar musu da wayoyin bogi ta hanyar wasu dillalai a sassan jihar.
A cikin wata sanarwa da kakakin rundunar, SP Suleiman Nguroje, ya fitar, ya bayyana cewa an kama wadanda ake zargin, Audu Abubakar da Nasiru Hassan, mazauna titin Bauchi da ke Karamar Hukumar Yola ta Arewa, bayan korafe-korafen da wadanda abin ya shafa suka gabatar, inda suka gano cewa wayoyin da suka saya ba na aiki ba ne, sai dai kwafi na bogi.
Sanarwar ta ce, “‘Yansanda na Rundunar Jihar Adamawa sun kama wasu mutum biyu da ake zargi da damfarar kwastomomin da ba su san komai ba, ta hanyar sayar musu da wayoyin bogi maimakon ingantattun wayoyi masu aiki.”
Nguroje ya ce kayayyakin da aka kwato daga hannun wadanda ake zargin sun hada da wayoyin bogi da dama da kuma wasu kayayyakin da za su zama hujja.
Sanarwar ta kara da cewa Kwamishinan ‘Yansandan jihar, Kabiru Hassan, ya umarci a gudanar da cikakken bincike kan lamarin, sannan a gurfanar da wadanda ake zargin a gaban kotu bayan kammala binciken.
Rundunar ta kuma bukaci al’umma su kasance cikin taka-tsantsan tare da sayen wayoyi daga dillalan da aka amince da su kadai.
Sanarwar ta kara da cewa, “Ana shawartar masu sayen waya da su gwada na’urar sosai tare da neman rasit kafin su biya kudi.”
