An gurfanar da akalla direbobi 123 a fadin Jihar Kano gaban kotu bayan Rundunar ‘Yansandan jihar ta kama su bisa zargin tuka motoci ba tare da lambar rajista ba ko kuma da lambobin mota da aka rufe, a wani bangare na ci gaba da aiwatar da Operation Clean Plate, wani shiri da aka kaddamar domin dakile ayyukan ta’addanci da sauran laifuka a jihar.
Rundunar ta kuma bayyana cewa ta kama wani mutum mai shekaru 51 a yayin gudanar da wannan samame, inda aka samu bindiga, tabar wiwi, wuka, wayoyin lantarki, batir lithium guda 120 da kuma wata mota da ake zargin ta sata ce a hannunsa.
Kwamishinan ‘Yansandan Jihar Kano, Ibrahim Adamu Bakori, ne ya bayyana hakan a ranar Litinin yayin da yake yi wa manema labarai bayani a hedikwatar rundunar da ke Bompai, Kano.
Bakori ya ce an kaddamar da wannan aiki ne domin magance amfani da motocin da ba su da ingantattun lambobin rajista, wanda ya ce masu aikata laifuka kan yi amfani da shi domin boye shaidarsu da kuma kauce wa binciken jami’an tsaro.
Ya ce tun bayan fara aikin, rundunar ta cafke irin wadannan motoci a kananan hukumomi daban-daban na jihar, kuma an gurfanar da dukkan direbobin a gaban kotu.
“Wannan ba kawai laifin karya dokar zirga-zirga ba ne. Dabara ce da masu aikata laifuka ke amfani da ita domin su boye asalinsu, su aikata laifi sannan su kauce wa kama su,” in ji Kwamishinan.
Ya kara da cewa: “Rundunar ‘Yansandan Jihar Kano karkashin jagorancina ba za ta bari a rika amfani da hanyoyinmu a matsayin mafakar masu aikata laifuka ba.”
Kwamishinan ya ce kamen da aka yi a Sashen ‘Yansandan Panshekara ya kara tabbatar da muhimmancin wannan shiri.
A cewarsa, a ranar 9 ga Yuli, 2026, jami’an da ke aikin sintiri sun tare wata mota da ba ta da lambar rajista, amma direban ya yi kokarin tserewa kafin daga bisani aka kama shi.
Bakori ya ce binciken da aka gudanar kan mutumin da motarsa ya kai ga gano bindiga, tabar wiwi, wuka, wayoyin lantarki, batir lithium guda 120 da kuma motar da ake zargin ta sata ce, inda ya kara da cewa an mika wanda ake zargin zuwa Sashen Binciken Manyan Laifuka (CID) na rundunar domin ci gaba da bincike.
Ya ce: “Abubuwan da aka kwato sun tabbatar da dalilin da ya sa muka kaddamar da Operation Clean Plate. Ana amfani da motocin da ba su da sahihin lambobin rajista wajen safarar mutane masu tayar da hankali, makamai da aka haramta, miyagun kwayoyi da sauran kayayyaki masu hadari a fadin jihar.”
Kwamishinan ya bayyana cewa rundunar na ci gaba da bincike domin gano asalin bindigar da sauran kayayyakin da aka kwato, tare da tantance ko suna da alaka da wata babbar kungiyar masu aikata laifuka.
Ya tabbatar wa al’ummar Kano cewa za a ci gaba da gudanar da wannan aiki a dukkan kananan hukumomi 44 na jihar, domin karfafa tsaro da hana masu aikata laifuka amfani da gibin da ke cikin tsarin tsaro.
“Operation Clean Plate ba zai tsaya ba. Za a ci gaba da aiwatar da shi tare da kara fadada shi a dukkan kananan hukumomin Jihar Kano,” in ji Bakori.
Ya kuma bukaci masu motoci da su tabbatar sun yi wa motocinsu rajista yadda ya kamata, sun samu ingantattun lambobin mota, sannan su cire duk wani abin da ke hana a iya gane lambar motar.
Haka kuma, ya roki mazauna jihar su ci gaba da bai wa jami’an tsaro hadin kai tare da ba su sahihan bayanai domin taimaka musu wajen hana aikata laifuka.
Bakori ya gargadi jami’an ‘yansanda da su guji duk wani rashin kwarewa ko cin zarafi yayin gudanar da aikin, yana mai jaddada cewa kwarewa da ladabtarwa su ne ginshikan aikin rundunar.
“Duk wani jami’in da ya aikata abin da bai dace ba a lokacin wannan aiki, a kai rahotonsa. Ladabtarwa da kwarewa ba abin sassauci ba ne,” in ji shi.
Ya kara da cewa Rundunar ‘Yansandan Jihar Kano za ta ci gaba da jajircewa wajen kare rayuka da dukiyoyin al’umma tare da kara inganta tsaro a fadin jihar.
