Tsohon Sanatan Shiyyar Daura, Sanata Ahmad Babba Kaita ya bayyana cewa zaben 2027 yaki ne zai kasance tsakanin talakawa da ake mulka da kuma shugabanni masu mulki.
Sanatan ya bayyana haka ne a lokacin da suke amsar ‘yan takara daga jam’iyyar adawa ta PDP su 268 da suka hada da kansiloli da ciyamoni da kuma ‘yan majalisun jiha a zaben 2023.
Haka ya jaddada cewa al’umma ta gaji da irin bakin mulkin da ake yi mata, saboda haka, alamu sun nuna cewa yakin dole sai an gwabza shi tsakanin bangarorin biyu na talakawa da masu mulki.
Zuwa yanzu dai jam’iyyar adawa ta PDP a Jihar Katsina na ci gaba da fuskantar tawaye daga ‘ya’yanta, domin shiga sabuwar hadaka da za a tunkari jam’iyya mai mulki a Jihar Katsina da kasa baki daya.
Kamar yadda suka bayyana, tsaffin ‘yan takara da suka hada da wadanda suka yi takarar majalisar jihar a zaben 2023 mutum 25 daga cikin talatin 34 a karkashin jam’iyar PDP.
Jagoran wannan sabuwar tafiya kuma tsohon sakataren gwamnatin Jihar Katsina, Mustapha Inuwa ne ya bayyana haka a lokacin da tsaffin ‘yan takarar suka je ofishinsa domin jadadda goyon bayansu kan sabuwar tafiya.
Shi ma da yake magana a madadin sauran ‘yan takarar majalisar dokokin jiha a zaben 2023, Hon. Jamilu Yahaya ya bayyana cewa sun fice daga jam’iyyar PDP ne saboda yadda aka nisantar da su daga al’umma wanda su ne ke yin zabe.
A nashi bangaren, shugaban ‘yan takarar shugabancin kananan hukumomi, Hon. Yasir Ibrahim ya ce sun shiga wannan hadaka ne saboda irin yaudarar shugabanci da aka yi masu a tsohuwar jam’iyyar PDP da ke fama da rikice-rikice.
Da yake nasa tsokaci, shugaban tsaffin ‘yan takarar kansiloli na jam’iyyar PDP a zaben da ya gabata, Hon. Usman Aminu ya bayyana cewa su 225 ne suka amince da wannan sabuwar tafiya, amma yana kokarin ganin sauran ma sun shiga an yi da su.
