Rundunar Ƴansandan Jihar Kano ta sanar da cafke wasu mutane huɗu da ake zargi da satar motoci tare da ƙwato motoci uku da aka sace tsakanin ranakun 8 da 9 ga watan Oktoba, 2026. Kakakin Rundunar, CSP Abdullahi Haruna Kiyawa, shi ne ya sanar da hakan a madadin Kwamishinan Ƴansandan Jihar, CP Ibrahim Adamu Bakori, yana mai cewa nasarar ta samu ne sakamakon amfani da bayanan sirri da fasahar zamani da dakarun yaƙi da garkuwa da mutane da jami’an shiyyar Ungogo suka gudanar.
Mota ta farko ƙirar Toyota Corolla ce (samfurin 2010), wadda wani Aminu Yahaya daga Unguwar Darmanawa ya ba wani dillali mai suna Sale Usman (wanda aka fi sani da Dambu) a Unguwar Fagge domin ya sayar masa tun ranar 22 ga Satumba. Maimakon ya kawo kuɗin, Dambu ya karkatar da motar zuwa Jihar Katsina, inda ƴansanda suka ƙwato ta a hannun wani mai suna Sulaiman da ya yi ikirarin cewa ya saye ta a kan Naira miliyan 7.5.
Mota ta biyu kuwa wata bas ce ta Toyota Hiace mai lambar NSR 261 XB da aka sato daga Kasuwar Singer a Kano. Jami’an tsaro sun bibiyi sawun motar har zuwa Mariri Magadawa a Ƙaramar Hukumar Kumbotso, inda suka yi nasarar damƙe matasa biyu da ake zargi da aikata satar, wato Abubakar Umar ɗan shekara 23 da Mustapha Zubairu Abdullahi ɗan shekara 25.
A ɓangare guda, jami’an sintiri na Shiyyar Ungogo sun tare wata babbar mota ƙirar Mitsubishi Canter mai lambar BLF 365 XA a hannun wani Abdullahi Adamu ɗan shekara 40, a yayin da yake ƙoƙarin kai ta wani gareji a Kadawa domin sauya mata fenti. Yayin da ake yi masa tambayoyi, Adamu ya amsa cewa ya sato motar ne daga Garejin Dan Baba da ke Potiskum a Jihar Yobe, lamarin da ya sa Rundunar Ƴansandan Kano ta tuntuɓi takwararta ta Yobe domin miƙa motar ga ainihin mai ita.
Kwamishinan Ƴansanda CP Bakori ya jaddada cewa za a gurfanar da dukkan waɗanda ake zargin a gaban kotu da zarar an kammala bincike, tare da gargaɗin al’umma da su sanya na’urorin tsaro a motocin, su kula da wuraren da suke ajiye su, kuma su guji sayen motoci a farashi mai arhar da ya wuce ƙima domin kauce wa faɗawa cikin laifin sayen kayan sata.
