Jam’iyyar PRP ta zaɓi tsohon Kakakin Majalisar Dokokin Jihar Kaduna, Rt. Hon. Aminu Abdulfatah, a matsayin ɗan takararta a zaɓen gwamna na 2027.
A cikin wata sanarwa, jam’iyyar ta ce an cimma wannan matsaya ne bayan shawarwari da tattaunawa mai zurfi tsakanin ‘yan takararta, inda aka amince a tsayar da ɗan takara guda domin a fuskanci zaɓen cikin haɗin kai.
PRP ta bayyana Abdulfatah a matsayin gogaggen ɗan siyasa kuma mai ƙwarewa a harkokin shugabanci da mulki, wanda ya shafe shekaru da dama yana hidimar jama’a.
Ya taɓa riƙe muƙamin Kakakin Majalisar Dokokin Jihar Kaduna, sannan ya kuma riƙe wasu muƙamai a hukumomin gwamnati daban-daban.
Jam’iyyar ta ce kasancewarsa a majalisa ya taimaka wajen ƙarfafa tsarin dimokuraɗiyya da inganta aikin dokoki a jihar.
A cewar PRP, zaɓensa ta hanyar haɗin kai ya nuna zaman lafiya da dunƙulewar jam’iyyar, tare da burin kawo sauyi mai kyau a Jihar Kaduna.
Jam’iyyar ta ƙara da cewa tana fatan magance matsalolin rashin tsaro, rashin aikin yi, talauci da rashin ingantaccen shugabanci idan ta samu nasara a 2027.
Haka kuma ta ce tana ci gaba da riƙo da manufofinta na gaskiya, adalci da mulkin jama’a, wanda ya samo asali daga jagoranta marigayi Alhaji Abdulkadir Balarabe Musa.
PRP ta bayyana cewa ta yi shirin lashe zaɓen gwamna na 2027 a Jihar Kaduna.
