Assalamu alaikum masu karatu, barkanmu da warhaka, barkammu da sake haɗuwa da ku a wannan makon a cikin wata mai alfarma na Ramadan a cikin shirin namu na Girki Adon Mata.
Watan Azumi lokaci ne da mutane suke ƙaurace wa abinci tun kafin ketowar Alfijir har zuwa faɗuwar Rana. Hakan yake sa mutane jin yunwa da ƙishin ruwa. Masu Azumi su kan ci abinci iri daban-daban a lokacin sahur da na buɗa baki.
- Buƙatar Taka-tsan-tsan Wajen Koya Wa Yara Ƙanana Azumi
- Ramadan: Lokutan Buda-Baki Da Sahur Na Azumi Na 8
Sai dai Likitoci sun bayyana nau’in abincin da ya kamata mai Azumi ya ci da wanda ya kamata ya ƙauracewa.
Dr Lawan Musa Tahir, wani likita a asibitin Nizamiye da ke Abuja, babban birnin tarayya, ya shaida irin abincin da ya kamata masu Azumi su ci da kuma waɗanda ba su kamata mai Azumi ya ci ba.
Wane nau’in abinci ya kamata mai Azumi ya ci?
Masu fama da wasu cututtuka: Masu Azumi sun kasu kashi-kashi: misali, akwai wanda da ma kafin Azumin, saboda da wata larura a asibiti za a ɗora shi kan abincin da ya kamata ya ci ko kada ya ci. Misali a nan shi kamar wanda yake da ciwon suga za a ɗora shi kan dokoki na yanayin abincin da zai ci, ko wanda yake da ciwon hanta, shi ma za a ɗora shi kan dokoki na abinci da zai ci.
Sai mai Olsa shima akwai abubuwan da ya kama ta ya ci da kuma wanda bai kama ta ba.
Haka kuma wanda yake da food allergy, wato wanda jikinsa ba ya karɓar wasu nau’o’in na abinci: to, wannan tun kafin Azumi akwai dokoki na yanayin abincin da yake ci, don haka idan Azumi ya zo zai ci gaba da bin dokokin.
Mutane masu lafiya:
Sai kuma mutanen da su da ma lafiyarsu ƙalau. Su ma ya danganta da inda suka samu kansu a lokacin Azumi.
Misali, idan mutum yana zaune a irin ƙasashenmu masu za fi inda mutane suke buƙatar yawan shan ruwa akai-kai, su ma akwai yadda ya kamata su yi.
Ga jerin abinci da abubuwan da suka kamata masu Azumi su ci:
A Guji cin abinci mai yaji da wanda yake da maiƙo sosai saboda zai ƙara musu ƙishirwa sannan akwai zafin gari. A ci abinci mai ruwa-ruwa, musamman ‘yaƴan itatuwa irin su Syaba, Abarba, Gwanda, Kankana da makamantansu.
A sha ruwan zafi kamar shayi ko koko ko kunu domin suna gyara ciki musamman bayan an daɗe ba a ci abinci ba.
A guji cika ciki fal da abinci za ka ga wasu suna cin abinci sosai idan an sha ruwa. Hakan yana da matsala. An fi so ka ci abinci kaɗan sannan ka huta yadda idan an jima za ka iya sake ci.
A guji shan taba da dangoginta saboda tana da illa. Babu laifi idan an motsa jiki lokaci Azumi amma a yi shi saisa-saisa.
