Kulawar mace bayan haihuwa tana da matuƙar muhimmanci domin lafiyarta da ta jariri.
A wannan lokaci jikinta yana cikin tsari na murmurewa daga gajiya, zubar jini, sauyin hormones, da nauyin kulawa da jariri. Saboda haka, tana buƙatar kulawa ta musamman wacce ta haɗa da jiki, tunani, abinci, tsabta, da bacci don kaucewa matsalolin da ake gani a lokacin jego.
- Kulawar Lafiyar Jiki
A lokacin kafin kwanaki arba’in, mai jego na buƙatar kula da kanta ta hanyar wanka da ruwa mai ɗumi, tsaftar ko’ina da jikin gaba ɗaya, da canza kayanta akai-akai. Idan tana da ciwon yankan tiyata wato (CS) ko na episiotomy, ya zama dole ta kiyaye tsaftar wurin, ta guji ɗaga abu masu nauyi, ta yi amfani da magungunan da aka rubuta mata, sannan ta dinga dubawa ko akwai kumburi, zafi ko wari. Kulawar jiki mai kyau tana taimaka wa hanta, mahaifa da sauran sassan jiki su dawo yadda ya dace.
- Kyawawan Dabi’u Da Hasken Sanin Allah, Halittar Annabawa Ce Ba Koya Suke Ba
- Kyawawan Halaye 2: Wasu Annabawa Da Sauran Bayin Allah Da Suka Yi Magana A Tsumman Jego
- Kyakkyawan abinci da shan ruwa
Jikinta yana buƙatar abinci mai gina jiki domin dawo da ƙarfin da ta rasa yayin haihuwa da kuma samar da isasshen mama. Abinci irin su kayan lambu, hatsi, nama, kifi, madara, da ’ya’yan itatuwa suna taimakawa sosai. Shan ruwa akai-akai yana hana ƙuraje, kuma yana hana kumburin ciki. Dole ta nisanci shan abubuwa masu haifar da zuwa bayangari, caffeine da shayi da yawa, da abinci mai yaji.
- Taimakon zuciya da kwantar da hankali
Sauyin yanayi bayan haihuwa na iya jawo damuwa, kuka ba tare da dalili ba, jin gajiya ko rashin ƙarfin gwiwa. Mai jego na buƙatar natsuwa, kwantar da hankali, kyakkyawar magana daga mijinta da iyayenta, da isasshen hutu. Taimakon tunani yana hana postpartum depression (cutar damuwar bayan haihuwa), wanda ke iya shafar kulawarta ga jariri.
- Isasshen bacci da hutu
Jikinta zai riƙa buƙatar bacci fiye da yadda ta saba. Tun da jariri yana tashi da dare, mace me jego ta riƙa kwanciya duk lokacin da ta samu dama. Bacci yana taimaka wa jiki farfaɗo da ƙwayoyin da suka lalace, sannan yana rage gajiya da ciwon baya ko kai.
- Gujewa ayyuka masu nauyi
A lokacin kwanaki arba’in, bai kamata mai jego ta riƙa aiki mai nauyi ba, kamar ɗaga jarka, dafa abinci mai tsawon lokaci, wanke kaya masu yawa da hannu. Wannan na iya jawo matsalar kamo iska a mahaifa, kumburi, ko zubar jini mai tsanani.
- Kula da Jinin Jego
Dole ta riƙa lura da launi, wari da yawan jinin jego. Idan jinin ya yi yawa fiye da al’ada, ko ya fara wari mai muni, ko ya dawo da ja sosai, ya zama tilas ta garzaya asibiti. Wannan na iya nuna cutar ciwon sanyi ko tsayawar mahaifa ba sosai ba.
- Ziyarar Asibiti:
A cikin makonni biyu zuwa shida bayan haihuwa, ya kamata ta je asibiti domin tabbatar da cewa mahaifa, hanta, jini da dukkan sassan jikinta sun dawo daidai. Likitoci su kan duba BP, jini,da lafiyar jariri.
