Gwamnatin Jihar Yobe ta sake jaddada aniyarta na ci gaba da aiwatar da manufar haɗa tsarin karatun addinin Musulunci da na zamani (dual education policy), a yayin buɗe gasar karatun Alƙur’ani mai girma ta jihar karo na 36 da aka shirya a Damaturu.
Da yake jawabi a wurin buɗe gasar a madadin Gwamna Mai Mala Buni, Mataimakin Gwamnan Jihar, Idi Barde Gubana, ya bayyana cewa gwamnatin jihar na ba da fifiko na musamman wajen inganta makarantun tsangaya da na allo ta hanyar shigar da ilimin boko da dabarun dogaro da kai a cikin manhajarsu, domin tabbatar da cewa ɗalibai sun sami dukkan nau’ukan ilimi guda biyu a lokaci guda.
Gubana ya bayyana cewa wannan shiri ba wai kawai zai inganta tarbiyya da dabarun rayuwa ga matasa ba ne, har ila yau wata babbar hanya ce ta rage yawan yaran da ba sa zuwa makaranta (out-of-school children) a faɗin ƙananan hukumomi 17 na jihar.
A nasa ɓangaren, Shugaban Kwamitin Shirya Gasar Karatun Alƙur’ani na Jihar, ya yaba wa gwamnatin jihar bisa tallafi da gudunmawar da take bayarwa a kowace shekara wajen gudanar da gasar cikin nasara, tare da tabbatar da cewa za a zaɓi ƙwararrun mahaddata da za su wakilci Jihar Yobe a gasar karatun Alƙur’ani ta ƙasa baki ɗaya.
A ƙarshe, an buƙaci alƙalan gasar da su tabbatar da adalci da gaskiya wajen tantance masu fafatawar, yayin da aka shawarci ɗaliban da su mayar da hankali wajen yin aiki da koyarwar Alƙur’ani mai girma a rayuwarsu ta yau da kullum.
