An kaddamar da bikin baje koli na kayayyakin amfanin jama’a na kasa da kasa na kasar Sin karo na 6, wanda zai gudana tun daga yau Litinin 13 zuwa Asabar 18 ga watan nan a lardin Hainan na kasar Sin.
A matsayinsa na bikin baje koli mafi girma a wannan fanni a yankin Asiya da tekun Pasifik, taken bikin na bana, shi ne “Sa kaimi ga sayayyar kayayyaki ta hanyar kofa bude, da samar da kyakkyawan yanayin zaman rayuwa ta hanyar yin kirkire-kirkire”. Kazalika, karkashinsa za a gudanar da tarukan gwajin kayayyaki, da gabatar da sabbin kayayyaki, da kuma hada masu samar da kaya da masu sayayya da sauransu.
An gabatar da kayayyaki iri-iri na kasa da kasa a gun bikin baje kolin na wannan karo, inda yawan kayayyaki daga kasashen waje da aka baje a gurin bikin na bana ya karu da kashi 20 cikin dari kan na shekarar bara.
Har ila yau, domin biyan bukatun mahalarta bikin da masu sayayya, a bana za a gudanar da jerin tarukan tsakaninsu. Hakazalika kuma, bisa taken “Sayayya a kasar Sin”, da kuma na “Fitar da kayayyaki zuwa kasar Sin”, za a gudanar da jerin bukukuwan gabatar da kayayyaki masu inganci na kasa da kasa, da hadin gwiwar kamfanonin kasa da kasa, da shawarwarin hadin gwiwar cinikayya ta yanar gizo a tsakanin kasa da kasa da dai sauransu. (Zainab Zhang)
