Wata kotu a ƙasar Norway ta samu Marius Borg Høiby, ɗan Gimbiya Mette-Marit, da laifin fyade sau biyu tare da yanke masa hukuncin ɗaurin shekaru huɗu a gidan yari.
Høiby mai shekaru 29 ya fuskanci tuhume-tuhume 40 da suka haɗa da fyade, da barazana, tashin hankali da cin zarafi, inda masu gabatar da ƙara suka nemi a ɗaure shi shekaru bakwai da watanni bakwai. Sai dai lauyoyinsa sun nemi a wanke shi daga manyan tuhume-tuhumen fyade.
Shari’ar ta ɗauki makonni shida kafin kammalawa a watan Maris, inda kotu ta saurari shaidu da dama tare da duba saƙonni, da hotuna da bidiyoyi da aka samu a wayarsa.
Ana zargin laifukan fyaɗen sun shafi mata huɗu tsakanin shekarar 2018 da 2024, yayin da aka ce wasu daga cikin matan suna barci ko kuma ba su cikin hayyacinsu lokacin da lamarin ya faru.
Lamarin ya ja hankalin duniya saboda alaƙarsa da gidan sarautar Norway, duk da cewa Høiby ba shi da sarauta ko wani matsayi na hukuma a fadar masarauta.
