An fara gudanar da gasar tseren dawakai ta ƙasa mai taken Renewed Hope a Kano, inda aka kawo sabon tsarin gudanar da tseren domin inganta adalci da daidaita gasar da ƙa’idodin duniya.
Da yake jawabi a wajen buɗe gasar, Mai Gudanarwa na Ƙasa na Hukumar Tseren Dawakai ta Nijeriya, Alhaji Mustapha Abubakar Bidda, ya bayyana Kano a matsayin ɗaya daga cikin cibiyoyin tseren dawakai mafi muhimmanci a Nijeriya, yana mai cewa tarihin wannan wasa a ƙasar ba zai cika ba tare da ambaton Kano ba.
Ya ce gasar za ta gudana daga ranar 25 zuwa 28 ga watan Yuni, tare da gudanar da tsere guda 20 da suka haɗa da dawakai daga sassa daban-daban na ƙasar nan.
Babban abin da ya bambanta gasar ta bana shi ne fara amfani da ‘starting gate’, wata sabuwar hanya da ke tabbatar da cewa duk dawakai sun fara tsere a lokaci guda.
Wannan ne karo na farko da ake amfani da tsarin a Nijeriya tun bayan fara tseren dawakai a shekarar 1962.Hukumar ta kuma sanar da cewa za a raba kyaututtukan kuɗi da suka kai kusan naira miliyan 50 tare da sababbin motoci guda bakwai ga waɗanda suka yi nasara.
An fara gasar ne a ranar Laraba, kuma ana sa ran za ta ƙare a ranar Asabar bayan kammala dukkan wasannin da kuma rabon kyaututtuka.
