Hukumomin Ukraine sun sanar da gano gawarwakin ’yan Nijeriya biyu a yankin Luhansk da ke gabashin ƙasar, inda aka ce suna cikin ayarin sojojin Rasha a yaƙin da ke ci gaba da fafatawa. A wata sanarwa, Hukumar Leƙen Asirin Tsaron Ukraine ta ce waɗanda aka gano sune Hamzat Kazeen Kolawole (42) da Mbah Stephen Udoka (38), waɗanda suka shiga rundunar sojin Rasha a shekarar 2025.
Sanarwar ta ce mutanen biyu sun yi aiki ne a rundunar 423rd Guards Motor Rifle Regiment (unit 91701) ta 4th Guards Kantemirovskaya Tank Division ta sojojin Rasha. An ce Udoka bai samu horon soja ba kafin a tura shi fagen fama, yayin da ba a samu bayanan horon Kolawole ba, amma akwai yiwuwar shi ma bai samu isasshen horo ba.
- Rasha Ta Bayar Da Gawarwakin Sojojin Ukraine 1,000
- Sin Na Goyon Bayan Duk Wani Mataki Na Warware Batun Ukraine Ta Hanyar Lumana
Rahoton ya nuna cewa an kashe su ne a ƙarshen watan Nuwamba sakamakon harin jirgin sama mara matuki (drone) yayin wani yunƙurin kai hari kan sansanonin sojojin Ukraine a yankin Luhansk. Ukraine ta gargaɗi ’yan ƙasashen waje da su guji tafiya Rasha domin neman aiki, tana mai cewa akwai haɗarin tilasta musu shiga rundunar soja.
A makon da ya gabata, CNN ta wallafa bincike da ke cewa wasu ’yan Afirka an yaudare su da alƙawarin ayyukan farar hula amma daga bisani aka tilasta musu shiga aikin soja. Sai dai Jakadan Rasha a Nijeriya, Andrey Podyelyshev, ya musanta zarge-zargen, yana mai cewa gwamnatin Rasha ba ta da alaƙa da irin wannan shiri.
