An gudanar da bikin kaddamar da shirin habaka sayyaya na ayyukan hidima na kasar Sin na shekara ta 2026 tare da kasuwar nishadi da cin abinci mai suna “Abinci Mai Dadi na Lardin Zhejiang” a birnin Hangzhou na lardin Zhejiang jiya Litinin, wanda ma’aikatar kasuwanci da babban rukunin gidan rediyo da talibijin na kasar Sin wato CMG suka shirya tare.
A wurin taron, ma’aikatar kasuwanci ta fitar da tsarin bikin sayayya na ayyukan hidimomi na Sin na shekara ta 2026, wanda aka yi a karkashin taken “Jin dadin ayyukan hidimomi masu kyau, samar da rayuwa mai farin ciki tare” .
Tsarin ya mayar da hankali kan bukatun rayuwar yau da kullun na jama’a, da neman rayuwa mai inganci, da bukatun hidimomin sayayya iri-iri.
Za a gudanar da bukukuwa na musamman fiye da 160 a duk shekara.CMG ya fitar da jerin sababbin tsare-tsare don ingiza matakan habaka sayayya na zamani, wadanda suka hada da yin amfani da gasar cin kofin duniya ta 2026, wadda Amurka, Kanada da Mexico za su karbi bakunci, don aiwatar da shirin habaka sayayya bisa taken “cin kofin duniya +” da kuma dogaro da cibiyar al’adu ta CMG wato TVCC, wato wani hadadden dandalin al’adu na kirkire-kirkire ne na kafafen yada labarai, don fitar da jerin ayyuka na musamman da sauransu. (Amina Xu)
