An yi bikin ranar harshen Sinanci da nuna al’adun gargajiyar kasar Sin a hedkwatar MDD dake birnin New York a ranar Litinin 13, domin murnar ranar harshen Sinanci ta Majalisar Dinkin Duniya karo na 17.
Kungiyar zaunannun wakilan kasar Sin dake MDD da Babban Rukunin Gidajen Rediyo da Talabijin na kasar Sin wato CMG ne suka kaddamar da bikin cikin hadin gwiwa.
Wakilai 200 da suka hada da zaunannen wakilin kasar Sin a MDD Fu Cong da manyan jami’an ofishin sakataren janar na MDD, da kuma wasu jakadun kasashen duniya ne suka halarci bikin.Fu Cong ya ce, MDD ta mai da hankali kan kare nau’o’in harsuna, da yin kira da a girmama nau’o’in wayewar kai na bil Adama.
Ya ce yadda ake murnar ranar harshen Sinanci cikin hadin gwiwa, ya nuna kokarin da ake yi na aiwatar da shawarar wayewar kai ta duniya, da inganta musayar wayewar kai da koyi da juna, da kuma kafa huldar cude-ni-in-cude-ka.Haka kuma, mataimakin shugaban sashen fadarkar da jama’a na kwamitin tsakiyar Jam’iyyar Kwaminis ta kasar Sin, kana shugaban CMG, Shen Haixiong ya gabatar da jawabi ta kafar bidiyo.
A cewarsa, a matsayin babbar kafar yada labarai dake kan gaba a kasashen duniya, CMG na mai da aikin yada al’adun kasar Sin da inganta musayar wayewar kai a matsayin muhimmin nauyin da ke wuyansa a ko da yaushe, domin nuna kyawawan al’adun gargajiyar Sin cikin wannan sabon zamani.
A sa’i daya kuma, CMG zai bayyana wa al’ummomin kasa da kasa labaran kasar Sin cikin wannan sabon zamani ta intanet, bisa taken “Yin hira a maimakon hamayya, warware sabani ta hanyar fahimtar juna”, ta yadda basirar Sin za ta ba da gudummawa ta fuskar kara musayar wayewar kai ta duniya. (Mai Fassara: Maryam Yang)
Discussion about this post