Tsohon mataimakiyar ministan harkokin wajen Sin Fu Ying, ta yi kira ga kasa da kasa su kara hadin gwiwa kan binciken kimiyya da kare muhalli a yankin Arctic, tana cewa sauyin yanayi maimakon barazanar da kawai ake tunani, shi ne babban kalubalen da yankin ke fuskanta.  Fu Ying ta bayyana haka ne lokacin da ta jagoranci tawagar Sin zuwa babban taron kasa da kasa kan yankin Arctic na 2026, wanda aka yi tsakanin Alhamis zuwa jiya Asabar a Reykjavik, babban birnin Iceland. Sama da wakilai 2,500 daga kasashe da yankuna 70 ne suka halarci taron domin tattaunawa kan batun da ya shafi fahimta da rayawa da ma shugabantar harkokin yankin Arctic.  Yayin wani zaman da aka yi wa taken “Yadda za a fahimci kasar Sin,” Fu Ying ta tattauna da tsohon shugaban Iceland da shugaban taron yankin Arctic, Olafur Ragnar Grimsson.  A cewarta, ainihin kalubalen da yankin Arctic ke fuskanta yanzu haka shi ne sauyin yanayi, kuma ya kamata kasashe su mayar da hankali da samar da albarkatu ga binciken kimiyya da kare muhalli, maimakon yin gasa kan barazanar tsaro da suke tunani ko hasashe.  Da take tsokaci kan ci gaban Sin da rawar da take takawa a harkokin kasa da kasa, Fu Ying ta ce Sin na nacewa ga neman ci gaba cikin lumana, kuma ba ta neman yin babbakere a duniya, kuma ba ta yarda cewa duniya na bukatar wani sabon salon babakere ba. (Mai fassara: Fa’iza Mustapha) 

An gudanar da taron yau da kullum karo na biyu kan tsarin tuntubar juna ta fuskar cinikayya da zuba jari tsakanin Sin da EU a birnin Beijing, daga ranar 8 zuwa 9 ga watan Oktoba.   A yayin taron, bangarorin biyu sun yi tattaunawa mai amfani da inganci, inda suka cimma matsaya kan sakamako guda 16 da suka shafi manyan fannoni guda hudu. Wannan ya nuna cewa Sin da EU suna da sha’awa da kuma hikimar magance bambance-bambance yadda ya kamata ta hanyar tattaunawa, ta yadda za su dakile habakar takaddama.  A cikin ’yan shekarun nan, ra’ayin ba da kariya yana karuwa a cikin EU. Wasu ’yan siyasa sun yayata cewa “Sin tana samar da kayayyaki fiye da yadda ake bukata”, ko kuma “Ana samun rashin daidaito tsakanin Sin da EU a fannin tattalin arziki ” da sauransu, wanda ya dasa shinge ga hadin gwiwar tattalin arziki da cinikayya tsakanin bangarorin biyu.   A watan Yunin bana, an gudanar da taron farko na tsarin tuntubar juna ta fuskar cinikayya da zuba jari tsakanin Sin da EU a Brussels dake Belgium, inda suka yarda cewa dalilin kafa tsarin shi ne, karfafa tattaunawa tsakanin ministoci kan manufofin cinikayya da zuba jari, ta yadda za a daidaita dangantakar bangarorin biyu.  Al’ammuran sun nuna cewa, Sin ba za ta zama tushen matsalolin Turai ba, kuma ita ce abokiya dake magance matsalolin.  Wani bincike da kungiyar ’yan kasuwa ta Sin dake EU ta fitar a watan Mayu ya nuna cewa, kashi 68% na kamfanonin da suka bayyana ra’ayoyi sun zabi kiyaye ko kuma fadada harkokinsu a Sin.  A halin yanzu, ra’ayin ba da kariya ba zai samu karbuwa a duniya ba, yayin da bude kofa da yin hadin gwiwa ke zaman hanyar da za a bi. Sin ta dade da hasashen cewa, dagewa wajen bude kofa da yin hadin gwiwa, da kuma warware bambance-bambancen tattalin arziki da cinikayya ta hanyar tattaunawa, ya dace da muradun Sin da EU.(Safiyah Ma) 

Asibitin Jirgin Sojin Ruwan Sin Ya Kammala Ayyukan Kiwon Lafiya A Guinea  By CGTN Hausa  Asibitin tafi da gidanka na jirgin sojin ruwan kasar Sin mai suna Auspicious Ark, ya bar kasar Guinea a jiya Asabar, bayan kammala ziyarar sada zumunta da ayyukan kiwon lafiya a wani bangare na shirin kiwon lafiya mai taken Mission Harmony-2026.  An gudanar da bikin ban kwana ga jirgin a tashar ruwa ta Conakry. Jami’an gwamnati da na rundunar sojin Guinea da jakadan Sin a kasar da babban jami’in soji na ofishin jakadancin Sin da sauran ma’aikatan ofishin da mazauna birnin da wakilan Sinawa mazauna ketare da na kamfanonin Sin, sun halarci bikin ban kwanan.  Jirgin mai gudanar da ayyukan kiwon lafiya, ya isa Conakry, babban birnin Guinea ne a ranar 3 ga wata. Yayin ziyarar, ya bayar da hidimomin lafiya ga mazauna, kuma ya yi nasarar gudanar da tiyata da dama, ciki har da na idanu da na cire manyan tsiro na hanyoyin jinni.    Baya ga kula da marasa lafiya, ya kuma tura tawagar jami’an lafiya masu bayar da horo zuwa asibitin abota ta Sin da Guinea, domin musayar ilimi da gudanar da ayyukan kiwon lafiya a wani sansanin soji.   Firaministan kasar Guinea, Amadou Oury Bah, ya ziyarci asibitin na tafi da gidanka tare da halartar wata liyafa da aka yi a cikinsa. Ya kuma bayyana godiya bisa ziyarar da jirgin ya kai da bayyana fatan kara hadin gwiwa tsakanin kasashen biyu, a karin bangarori a nan gaba. (Mai fassara: Fa’iza Mustapha)  Asibitin Jirgin Sojin Ruwan Sin Ya Kammala Ayyukan Kiwon Lafiya A GuineaBy CGTN...

Babban rukunin gidajen rediyo da telabijin na kasar Sin (CMG), ya kaddamar da sabon aikin yayata tamburan kasuwanci na kasar Sin, jiya Asabar, a birnin Beijing na kasar.  Shugaban CMG, Shen Haixiong, da mataimakin ministan kula da albarkatun ruwa na kasar Sin, Liu Dongshun, da dimbin manyan kusoshi sun halarci bikin kaddamarwar, inda suka shaida kafuwar wani dandalin samar da bayanan gaske masu alaka da tamburan kasuwanci na kafar CMG.  Da yake jawabi a wajen bikin, Mista Qi Zhuquan, mataimakin shugaban CMG, ya ce CMG din zai yi kokarin samar da karin gudunmowa ga yunkurin yayata tamburan kasuwanci na kasar Sin, ta hanyoyin gudanar da bincike, da mu'amala da bangarori daban daban, da raya harkoki masu alaka da fasahohin zamani, da dai sauransu.  Kana duk a jiya Asabar, an shirya taron kulla hadin gwiwa bisa wasu manyan ayyukan da kafar CMG za ta gudanar da su a shekarar 2027 mai zuwa, a birnin na Beijing, inda aka gabatar da wasu manyan ayyuka fiye da 110 da kafar CMG za ta aiwatar, masu nasaba da aikin watsa labarai, da tsara wasan kwaikwayo na telabijin, da daukar fim din labarin gaskiya, da shirye-shiryen nishadantarwa, da dai makamantansu. (Bello Wang) 

Kwamitin kolin jam’iyyar Kwaminis ta Sin JKS da majalisar gudanarwa ta Sin sun fitar da “Ra’ayi kan bunkasa sabbin karfin samarwa mai dorewa”.  “Ra’ayin” ya gabatar da muhimman matakai 19 bisa la’akari da kirkire-kirkire a bangarori 5. Na farko dai, karfafa kirkire-kirkiren kimiya da fasaha. Inganta kirkire-kirkiren kimiya da fasaha na asali da masu kawo sauyi, hanzarta samun ci gaban muhimman fasahohin da ake bukata da kara karfin kasar a bangaren kimiya bisa manyan tsare-tsare, kuma da karfafa matsayin manyan kamfanoni ta fuskar kirkire-kirkiren kimiya da fasaha, da hanzarta juya sakamakon kimiya da fasaha zuwa karfin samarwa a zahiri.   Na biyu, ingiza hadin gwiwa mai zurfi tsakanin kirkire-kirkiren kimiya da fasaha da kirkire-kirkiren masana’antu. Gyara da bunkasa masana’antu na gargajiya, da bunkasa sabbin masana’antu, da tsara makomar masana’antu nan gaba, da ingiza hadin gwiwa mai zurfi tsakanin tattalin arziki mai samar da kayayyaki da tattalin arzikin yanar gizo, da aiwatar da shirin “AI +” a dukkan fannoni.   Na uku, mai da hankali kan ingiza kirkire-kirkire kan hanyoyi samun ci gaba. Gina tsarin tattalin arziki mai dorewa, kuma mai amfani da makamashi mai tsafta, ba tare da gurbata muhalli ba,sannan kuma a inganta manufofin ci gaba mai dorewa, da ingiza yi wa tsarin makamashi kwaskwarima.   Na hudu, ci gaba da ingiza kirkire-kirkire kan tsarin gudanarwa. Mai da hankali kan hadin gwiwa tsakanin kimiya da fasaha da tattalin arziki wajen zurfafa kwaskwarima a cikin gida, inganta tsarin kula da kasuwa, kara samar da sabbin kayayyakin hada-hadar kudi, da rarraba kayan samarwa na zamani a duk fadin duniya.   Na biyar, zurfafa kirkire-kirkire kan tsarin aikin ma’aikata. Horar da kwararru da ake bukata cikin gaggawa don bunkasa sabbin karfin samarwa, da inganta tsarin sauyawa ma’aikata wuraren aiki. (Amina Xu) 

Ana kiran lambar yabo ta Fields da lambar yabo ta Nobel a fannin lissafi, kuma tana daya daga cikin manyan lambobin yabo na bangaren lissafi na duniya. Ana bayar da lambar yabo ta Fields duk bayan shekaru hudu-hudu ga wadanda suka fi samar da gudummawa a fannin lissafi a duniya kana shekarunsu ba su haura 40 a lokacin ba. Maxim Kontsevich yana daya daga cikin wadanda suka samu irin lambar yabon. A cikin shekaru da dama da suka wuce, ya kiyaye yin mu’amala sosai tare da bangaren lissafi na kasar Sin, da kasancewa manazarci na jami’o’i da hukumomin nazarin kimiyya da fasaha na kasar Sin.  A kwanakin baya, yayin da yake hira da wakiliyar babban gidan rediyo da telebijin na kasar Sin wato CMG, Kontsevich ya bayyana cewa, yana sha’awar tsarin zamantakewar al’ummar kasar Sin. Kasar Sin ta iya daidaita albarkatu da tsara shirye-shirye da kuma aiwatar da ayyuka, a ganinsa, kasashen yammacin duniya ba su da irin wannan tsarin. A sakamakon tinkarar matsaloli iri daban daban, a halin yanzu zai yi matukar wuya kasashen yammacin duniya su iya aiwatar da manyan ayyuka masu dogon zango. (Zainab Zhang)

Ofishin Harkokin Taiwan Na Kasar Sin Ta Amsa Tambayoyi Kan Jawabin Lai Ching-te Na Ranar 10 Ga Watan OktobaBy CGTN...

Kasar Sin da Kungiyar Tarayyar Turai (EU) sun amince su ci gaba da tabbatar da dorewar alakokin tattalin arziki da cinikayya a tsakaninsu tare da kara daidaita su, yayin da suka kammala taronsu na biyu na tsarin tuntuba kan harkokin cinikayya da sa-hannun jari a Beijing. A daidai lokacin da tsarin gitta shingen kasuwanci da yin gaban-kai ke karuwa, yadda Sin da EU suka kuduri aniyar yin shawarwari bisa daidaito da gudanar da tattaunawa mai alfanu, ya zama wani abin kwatance mai kyau, wanda ke ba da kwarin gwiwa da tabbacin da ake matukar bukata ga tattalin arzikin duniya dake sauyawa.  Sin da EU manyan abokan huldar kasuwancin juna ne na biyu mafi girma. Bayanan da babbar hukumar kwastam ta kasar Sin (GAC) ta fitar sun nuna cewa, kasuwancin kayayyaki tsakanin Sin da EU ya zarce dalar Amurka biliyan 800 a shekarar 2025. Tattalin arzikin Sin da na EU suna matukar taimaka wa juna, tare da samun moriyar juna mai zurfi a tsakaninsu. Matakin rarraba huldar tattalin arziki da kuma katse hanyoyin samar da kayayyaki ba zai haifar da komai ba illa cutar da huldar tattalin arziki da kasuwancin Sin da EU, da kuma tsarin kasuwanci na duniya baki daya.  Wani bincike na jin ra’ayoyin jama’a da CGTN ta gudanar ta shafin intanet a duniya ya nuna cewa, kashi 82.8 cikin 100 na wadanda suka bayyana ra’ayoyinsu sun yi imanin cewa, gitta shingen cinikayya ba za ta magance matsalolin sake fasalin masana'antu da kasashen Turai ke fuskanta ba, kuma hakan ma zai kara ta'azzara yanayin cinikayyar kasa da kasa ne kawai. A wani bangaren kuma, kashi 82.6 cikin 100 na wadanda suka bayyana ra’ayoyinsu, sun yi imanin cewa matakan gitta shingen kasuwanci za su lalata karfin gasar kasuwanci ta yankin na Turai. (Abdulrazaq Yahuza Jere) 

Babban rukunin gidan radiyo da talabijin na kasar Sin (CMG) ya gudanar da wani bikin waka domin sada zumunci tsakanin...

An gudanar da bikin samar da lambar yabo ga aikin ilmantar da ’ya’ya mata na UNESCO na shekarar 2026 a birnin Paris na Faransa jiya Juma’a. farfesa Peng Liyuan, uwar gidan shugaban kasar Sin Xi Jinping, kuma wakiliyar musamman ta UNESCO kan ingiza aikin ilmantar da ’ya’ya mata, ta aika da jawabi ta faifan bidiyo zuwa bikin, don taya murna.  A jawabinta farfesa Peng Liyuan ta nuna cewa, Sin ta dade tana mai da hankali sosai kan ba da ilmi ga ’ya’ya mata, kuma tana hadin gwiwa da UNESCO da sauran bangarorin da abin ya shafa tare da samun ci gaba a zo a gani, wanda ya amfani mata da dama a kasashe da yawa.  A shekarun baya-bayan nan, Sin ta yi amfani da fasahar AI don karfafa karfin ba da ingantaccen ilmi, wanda hakan ya taimaka sosai wajen ingiza daidaito tsakanin jinsi a fannin ba da ilimi da inganta rayuwar mata gaba daya, kuma ta more dabarunta ga kasashe masu tasowa.  A cewarta, ana dora nauyi sosai a kan aikin ba da ilmi ga ’yan mata da mata a cikin dogon lokaci. A matsayinta na wakiliyar musamman ta UNESCO kan ingiza ilmantar da ’yan mata da mata, Peng ta yi kira ga al’ummar duniya da su hada hannu wajen karfafa koyar da sana’o’i da horar da mata, da karfafa karfin horar da mata a bangaren fasaha ta zamani, ta yadda za su ci gajiyar hakan, da samar musu makoma mai haske.  Peng Liyuan ta kara da cewa, tana fatan hadin gwiwa da kowane bangare wajen ingiza samun kasaitaccen ci gaba kan aikin ilmantar da ’ya’ya mata, da ba da gudummawa wajen taimakawa mata wajen samun makoma mai haske. (Amina Xu)