A ranar 25 ga watan nan ne, mataimakin shugaban kasar Sin Han Zheng, ya gana da babban sakataren Majalisar Dinkin Duniya, Antonio Guterres, yayin da yake halartar babban taron MDD a birnin New York na kasar Amurka, tare kuma da halartar babban taron tattaunawa na cika shekaru biyar da gabatar da shawarar raya ci gaban duk fadin duniya (GDI) da kasar Sin ta karbi bakuncinsa, da karanta sakon shugaba Xi Jinping na murnar taron.  A ganawarsa da Antonio Guterres, Han Zheng ya bayyana cewa, a bana ake cika shekaru 55 da mayar wa Jamhuriyar Jama’ar kasar Sin halastacciyar kujerarta a MDD. A cikin shekaru 55 da suka gabata, har zuwa yanzu, Sin ta tsaya ga bin ra’ayin mu’amalar mabambantan sassa a duniya, da goya wa MDD baya wajen taka muhimmiyar rawa a harkokin duniya. A nan gaba kuma, kasar Sin za ta ci gaba da taka rawar a-zo-a-gani a matsayin wata babbar kasa, da himmatuwa wajen kara hada akidu da shawarwarinta da ajandar MDD, gami da samar wa duniya sabbin damarmaki bisa sabbin nasarorin da ta samu wajen zamanantar da kasa.  Antonio Guterres a nasa bangaren kuwa, gode wa kasar Sin ya yi saboda babban goyon-bayan da take bayarwa ga sha’anin MDD, inda ya ce, kasar Sin ta taka muhimmiyar rawa wajen samar da ci gaba ga muhimmiyar ajandar MDD, tare da bayar da babbar gudummawa ga ci gaban duk duniya baki daya.  Har wa yau, a babban taron tattaunawa na cika shekaru biyar da gabatar da shawarar raya ci gaban duk fadin duniya (GDI), mataimakiyar babban sakataren MDD, Amina Mohammed, da firaministan kasar Pakistan, Muhammad Shahbaz Sharif, da mataimakin shugaban kasar Maldives, Hussain Mohamed Latheef, gami da mataimakin firaministan kasar Laos kuma ministan harkokin wajen kasar, Thongsavanh Phomvihane, sun gabatar da jawabai daya bayan daya, kuma manyan jami’ai daga kasashe sama da 30, da wakilai fiye da 300 daga kasashe sama da 60 da kungiyoyin kasa da kasa sama da 20 su ma suka halarci taron.  Bangarori daban-daban sun yaba sosai da muhimmiyar rawar da shawarar raya ci gaban duk fadin duniya ta taka, tun bayan da aka gabatar da ita shekaru biyar da suka wuce har zuwa yanzu, musamman a fannonin da suka shafi samar da ci gaba mai dorewa ga sassan kasa da kasa, da taimaka wa aiwatar da ajandar samun ci gaba mai dorewa ta shekarar 2030. (Murtala Zhang) 

Mataimakin shugaban kasar Sin, Han Zheng, ya bayyana a jiya Jumma'a cewa, kasar Sin a shirye take ta yi aiki tare da Ghana domin aiwatar da muhimman yarjejeniyoyin da shugabannin kasashen biyu suka cimma, da kuma ci gaba da raya dadadden zumunci, da karfafa amincewa da juna a fannin siyasa, da fadada hadin gwiwa a aikace, tare da ci gaba da zurfafa hadin gwiwa bisa manyan tsare-tsare a tsakanin Sin da Ghana.  Han ya bayyana hakan ne yayin da yake ganawa da shugaban kasar Ghana, John Dramani Mahama, a birnin New York, a gefen taron babban zauren Majalisar Dinkin Duniya karo na 81.  A nasa bangare, Mahama ya bayyana cewa, dangantakar da ke tsakanin Ghana da Sin tana da tushe mai kwari na tarihi, kuma Ghana tana matukar godiya da kyakkyawan goyon baya da taimakon da Sin take bayarwa cikin shekaru da dama.  Mahama ya bayyana cewa, a kodayaushe Ghana tana bin manufar "kasar Sin daya tak a duniya" sau-da-kafa, kuma tana fatan karfafa hadin gwiwa da kasar Sin a fannoni irin su cinikayya, da zuba jari, da hakar ma'adanai da ayyukan masana'antu, tare da inganta musaya a tsakanin al'ummomin kasashen biyu domin ci gaba da habaka dangantakar da ke tsakaninsu. (Abdulrazaq Yahuza Jere) 

Gwamnan babban bankin kasar Ghana, Johnson Asiama, ya bayyana cewa, mahukuntan kasar za su yi aiki tare da takwarorinsu na kasar Sin domin kawar da tsarin amfani da kudin wata kasa ta daban wajen biyan kudin cinikayya tsakanin 'yan kasuwar Ghana da masu samar da kayayyaki na kasar Sin.   A yayin taron manema labarai na baya-bayan nan da kwamitin manufofin kudi na kasar ya gabatar da yammacin ranar Alhamis da ta gabata, Asiama ya ce, sauya tsarin, wanda zai kawo karshen biyan kudi ta hanyar amfani da kudin wata kasa ta daban ya zama wajibi don inganta cinikayyar Ghana da Sin, yayin da 'yan kasuwa na kasar ke kokarin cin gajiyar manufar soke biyan harajin kwastam da gwamnatin Sin ta samar ga kasashen Afirka 53 da ke da huldar diflomasiyya da ita.  A cewar gwamnan babban bankin dai, kasar ta yammacin Afirka na daukar matakan kirkiro da tsarin biyan kudade kai-tsaye tsakanin kudin Ghana (Cedi) da na kasar Sin (RMB); kasancewar amfani da kudin wata kasa ta daban yana haifar da tsarin canza kudin waje sau biyu, lamarin da ke sanya 'yan kasuwa biyan kudin canji sau biyu maimakon sau daya.  Kazalika, gwamnan ya bayyana kasar Sin a matsayin muhimmiyar abokiyar kasuwanci ga kasar tasu da ke Yammacin Afirka, inda ya kara da cewa babban bankin Ghana zai ci gaba da yin mu'amala da kasar ta Sin kan batutuwa daban-daban da suka shafi muradun kasashen biyu. (Abdulrazaq Yahuza Jere) 

Shugaban kasar Sin Xi Jinping, ya aike da sakon taya murna ga taron manyan jami’ai albarkacin cika shekaru 5 da gabatar da Shawarar Ci Gaban Duniya (GDI), wanda aka yi a hedkwatar MDD da ke New York a Juma’a.  Shugaban ya ce, shekaru 5 ke nan da ya gabatar da shawarar GDI ga babban zauren MDD domin inganta hadin gwiwa wajen samar da ci gaba a duniya, da karfafa kokarin duniya na samun ci gaba da taimakawa wajen gaggauta aiwatar da ajandar samun ci gaba mai dorewa ta shekarar 2030.  Ya ce cikin sama da shekaru 5, an aiwatar da shawarar sosai bisa hadin gwiwar dukkan bangarori, inda ayyukan hadin gwiwa da aka yi karkashin shawarar suka samu wurin zama da kyawawan sakamako a kasashe sama da 20, tare da rubuta sabon babin ci gaba na bai daya da hadin gwiwar moriyar juna.   A matsayinta na kasa mai tasowa mafi girma kuma mamba cikin rukunin kasashe masu tasowa, kasar Sin a shirye take ta hada hannu da dukkan bangarori wajen daukaka falsafar ci gaba mai sanya mutane a gaba da komai da daukaka shawarar GDI da tabbatar da burikan ci gaba masu dorewa sun zama na zahiri da bayar da sabbin, kuma manyan gudunumuwa wajen gina al’umma mai makoma ta bai daya ga daukacin bil Adama. (Fa’iza Mustapha) 

Yayin da shugaban kasar Sin Xi Jinping ke ziyarar aiki a Amurka, shugaban majalisar bunkasa kasuwanci tsakanin Amurka da Sin, Sean Stein ya yi tsokaci game da muhimmancin da raya dangantakar Sin da Amurka cikin kwanciyar hankali da aminci da dorewa ke da shi ga kasashen duniya.  Sean Stean ya yi tsokacin ne yayin wata hira da babban rukunin gidajen rediyo da talabijin na Sin (CMG), inda yake cewa, kyakkyawar dangantaka tsakanin Sin da Amurka ba kasashen biyu kadai za ta amfanawa ba, za ta kuma kawo tabbaci ga kasashen da ke fadin duniya. Ya ce ko kasashen ASEAN ko kasashe maso tasowa da kasashen Turai ko Latin Amurka, duk za su san yadda za su yi hulda da Sin da Amurka a lokaci guda.  Baya ga haka, babu wata kasa da ke son goyon bayan wani bangare, domin kowace tana da moriya a hulda da dukkan kasashen watau Sin da Amurka. Ya ce samun dangantaka mai kwanciyar hankali tsakanin Sin da Amurka, zai ba kasashe damar neman cimma muradunsu da kansu da kuma samun alfanu daga hulda da Sin da Amurka. (Fa’iza Mustapha) 

Ranar 25 ga wata da yamma bisa agogon Amurka, shugaba Xi Jinping na kasar Sin ya kammala ziyarar aiki da...

Shugaban kasar Sin Xi Jinping da uwargidansa Peng Liyuan, sun tattauna tare da shan shayi da shugaban kasar Amurka Donald Trump da uwargidansa Melania Trump. Shugabannin kasashen biyu sun kuma amince da gina muhimmiyar dangantaka mai ma’ana bisa girmama juna da adalci da musaya.  Xi Jinping ya jaddada cewa, makomar dangantakar Sin da Amurka na da haske, wanda ke alamta wani yanayi da ba za a iya gujewa ba. A lokaci guda kuma, hanyar kyakkyawar makoma na cike da kalubale da wahalhalu daban-daban. Kuma da ma hakan ya dace da yanayin samun ci gaban komai. Ya ce, a shirye yake ya hada hannu da shugaba Trump, cikin kuzari da sanin ya kamata, domin hada hannu wajen rubuta kyakkyawan babi a tarihin dangantakar Sin da Amurka.  A cewar Donald Trump, ziyarar aiki ta shugaba Xi a Amurka tana tattare da ma’ana da nasara. Kuma bangarorin biyu sun yi tattaunawa mai zurfi kan dangantakar kasashensu da manyan batutuwan kasa da kasa da na yankuna. Ya ce yana sa ran ci gaba da tuntubar juna da shugaba Xi, domin hada hannu wajen jagorantar raya dangantakar Sin da Amurka.  Bayan tattaunawar da suka yi yayin shan shayi, Xi da Peng Liyuan sun ziyarci Cibiyar Adana Bayanai ta Amurka tare da shugaba Trump da uwargidansa.   A cewar shugaba Xi, sama da shekaru 250 da suka gabata, Amurkawa sun yi gwagwarmayar cimma burin gina babbar kasa, mai wadata da kyau a nahiyar Amurka ta Arewa. Su kuma al’ummar Sinawa, sun daukaka al’adunsu na gargajiya, kuma suna ci gaba da samun sabbin nasarori a tafarkin cimma burin kasar na farfadowa.  Sin da Amurka kasashe ne da ke da bambancin yanayi. Sai dai duk da bambancin tarihi da al’ada da yanayin zamantakewa da tafarkinsu na neman ci gaba, al’ummomin kasashen biyu na da buri guda na samun kyakkyawar rayuwa. Ya ce amincewa da girmama bambance-bambancen da ke akwai tsakaninsu, da karfafa fahimta da koyi da juna da neman yanayi mai dacewa na hulda a tsakaninsu da fadada jerin bangarorin hadin gwiwa da tafiyar da bambancinsu yadda ya kamata, za su taimaka wajen samun kyakkyawar dangantaka tsakanin kasashen biyu da dorewarta. (Fa’iza) 

A ranar 24 ga wata, mataimakin wakilin dindindin na kasar Sin a Majalisar Dinkin Duniya, Sun Lei, ya gabatar da jawabi a taron ministocin harkokin waje na kasashe masu tasowa da ba su da teku, inda ya yi kira da a inganta yanayin ci gaban kasashen.  Sun Lei ya bayyana cewa, ya kamata kasashen duniya su ci gaba da yin riko da tsarin ciniki na mabambantan bangarori, da inganta matakin sakin mara ga kasuwanci da kuma saukaka shi, kana a samar da yanayi mai kyau ga kasashe masu tasowa da ba su da teku ta yadda za su shiga cikin tsarin dunkulewar tattalin arzikin duniya. Haka nan ya kamata hamshakan kasashe su cika alkawarin tallafin samar da ci gaba a hukumance da kuma taimaka wa kasashe masu tasowa da ba su da teku su magance matsalolinsu na kudi.  Ya kuma bayyana cewa, a ko da yaushe kasar Sin ta kasance mai tsayuwar daka wajen ba da cikakken goyon baya da karfafa batun inganta farfadowa da kuma ci gaban kasashe masu tasowa da ba su da teku, kuma a shirye take ta yi aiki tare da dukkannin bangarori wajen aiwatar da shirin matakan da aka dauka, da kuma samar da sabon yanayi na samar da ci gaba da farfado da wadannan kasashe. (Mai Fassara: Abdulrazaq Yahuza Jere) 

A ranar 24 ga wata, mataimakin wakilin dindindin na kasar Sin a MDD, Sun Lei, ya yi jawabi a yayin wata tattaunawar manyan jami’ai da ba a shirya ba a hukumance a tsakanin kwamitin sulhun MDD da kungiyar kasashen Larabawa, inda ya jaddada cewa ya kamata kasashen Gabas ta Tsakiya su rike ragamar tsaron yankin a hannunsu bisa cin gashin kai.  Sun Lei ya bayyana cewa, kasar Sin tana goyon bayan karfafa hadin gwiwa tsakanin kwamitin sulhu na MDD da kungiyar kasashen Larabawa, tana kuma goyon bayan kungiyar kasashen Larabawa ta taka rawar gani a harkokin tsaron yankin, kana tana karfafa magance matsalolin yankin ta hanyar da ta dace da yanayin yankin.   Kazalika, batun Falasdinu har yanzu shi ne babbar matsalar Gabas ta Tsakiya. Kuma ya kamata kasashen duniya su dauki kwararan matakan da ba za a iya wargazawa ba domin aiwatar da tsarin "kafa kasashe biyu" da kuma cimma burin kafa kasar Falasdinu mai cin gashin kanta cikin hanzari. (Mai Fassara: Abdulrazaq Yahuza Jere) 

Da yammacin ranar 24 ga watan Satumban nan agogon Amurka, shugaban kasar Sin, Xi Jinping da uwargidansa Peng Liyuan, sun halarci liyafar maraba da shugaban Amurka, Donald Trump da uwargidansa, Melania suka shirya musu a Fadar White House, inda shugaba Xi ya yi jawabi.  A jawabin nasa, shugaba Xi ya bayyana cewa, cikin kasa da watanni shida, shugabannin kasashen Sin da Amurka sun ziyarci juna, lamarin da ya kafa tarihi a huldar dake tsakanin kasashen biyu. Tun da farko a ranar dai, shugaba Xi ya gudanar da tattaunawa ta gaskiya da gaskiya kuma mai zurfi tare da shugaba Trump, inda suka cimma sabbin yarjejeniyoyi da dama. Tattaunawar dai ta karfafa tushen samun kwanciyar hankali mai ma’ana bisa manyan tsare-tsare a huldar Sin da Amurka, da kuma samar da sabon jagoranci bisa manyan tsare-tsare ga huldar dake tsakanin kasashen biyu.  Kazalika, Xi ya bayyana cewa, shugaba Trump ya yi kira da a sake mayar da Amurka gawurtacciyar kasa, kuma ya jagoranci al'ummar Amurka wajen samun gagarumar nasara da ci gaba. A daya bangaren kuma, kasar Sin ta kuduri aniyar cimma burin bunkasa ci gaban kasar ta Sinawa, inda tsarin zamanantarwa mai salon musamman na kasar Sin ke ci gaba da samun sabbin nasarori.  Dukkan manufofin biyu dai suna da matukar muhimmanci, kuma kasashen biyu za su iya samun cikakkiyar nasara ta hanyar tallafa wa muradun juna. Ya kamata kasar Sin da Amurka su nuna halin dattaku na sauke nauyin da ya dace da manyan kasashe, su yi la'akari da burin al'ummominsu da kuma yanayin zamani, tare da neman sabuwar hanyar da za ta bai wa manyan kasashen damar zama tare cikin lumana da fahimtar juna.  A nasa bangare, shugaba Trump na kasar Amurka ya yi jawabin cewa, ya ji dadin kaunar da jama'ar kasar Sin suka nuna masa, yayin ziyarar da ya yi a birnin Beijing na kasar Sin a wasu watanni da suka gabata. Kana a yanzu haka da shugaba Xi Jinping da uwargidansa suke sake yin ziyara a Washington D.C. bayan shekaru fiye da goma, ana son nuna musu irin waccan kaunar, gami da tarbar su da hannu biyu-biyu.   Shugaba Trump ya kara da cewa, ko da yake akwai bambancin tsarin siyasa dake kasancewa tsakanin kasashen Amurka da Sin, amma abokantakarsu na kara karfafuwa. Ya ce yana son kokarin aiki tare da shugaba Xi Jinping, don kara kyautata hulda tsakanin kasashensu, da tabbatar da walwala da tsaro masu dorewa a kokarin amfanar da zuriyoyi masu zuwa. (Abdulrazaq Yahuza/Bello Wang)