Bisa gayyatar da shugaba Donald Trump na kasar Amurka ya yi masa, shugaban kasar Sin Xi Jinping a yanzu haka yana ziyarar aiki a kasar ta Amurka. Kana a wannan ranar da muke ciki, wato lokacin da Sinawa suke murnar bikin gargajiya na Zhong Qiu (tsakiyar kaka), shugabannin kasashen Sin da Amurka sun yi ganawa a Washington D.C, gami da halartar bikin liyafa tare. Lamarin da ya nuna cikakken sahihanci da aminci da ake samu wajen karfafa zumunta da hulda ta hadin kai tsakanin kasashen biyu.  Sai dai mene ne tasirin haduwar shugabannin Sin da Amurka ga kasashen Afirka? Dangane da wannan tambaya, Sizo Nkala, masanin ilimin al'amuran duniya, dan kasar Afirka ta Kudu, ya ce yadda shugabannin biyu suka gudanar da cudanya kai tsaye zai samar da damar karfafa fahimtar juna da kyautata hulda tsakanin manyan kasashen biyu, abun da ke da matukar muhimmanci ga yunkurin raya tattalin arziki da tabbatar da kwanciyar hankali a duniya. Kana a nasa bangare, Onyango K'Onyango, wani shahararren dan jarida na kasar Kenya, ya ce huldar dake tsakanin Sin da Amurka tana haifar da tasiri kan yanayin tattalin arzikin duniya. Idan kasashen biyu sun iya magance rikici da ci gaba da cudanya da juna, to, dimbin kasashe masu tasowa za su samu damar hadin gwiwa da karin abokan hulda, da raya tattalin arzikinsu yadda suke bukata.  Sakamakon da aka samu wajen ganawar da shugabannin Sin da Amurka suka yi a wannan karo ma ya nuna cewa, hasashen da masu sharhi na kasashen Afirka suka yi ya yi daidai. Saboda a lokacin da shugabannin biyu ke zantawa da juna, shugaba Xi na kasar Sin ya ce, kasashen Sin da Amurka za su iya tabbatar da moriyar juna, da daidaita sabanin ra'ayi, da karfafa amincewa da juna, da tushen zaman lafiya, a kokarin samar da wata hulda mai kyau tsakanin kasashen biyu, wadda za ta amfani jama'ar kasashen da al'ummun duniya. Kana a nasa bangare, shugaba Trump na kasar Amurka ya ce, tabbas ne za a iya kyautata huldar dake tsakanin kasarsa da kasar ta Sin, bisa jagoranci da shi da shugaba Xi suke yi.  Ban da ganawar da sugabannin biyu suka yi, a kwanan nan, tawagogin tattalin arziki da kasuwanci na kasashen biyu sun gudanar da zagaye na takwas na tattaunawar tattalin arziki da cinikayya a Amurka. Bangarorin biyu sun yi shawarwari na gaskiya masu zurfi kan batutuwan tattalin arziki da cinikayya da suka shafe su, kamar aiwatar da yarjejeniyar matsayar da aka cimma a tattaunawar tattalin arziki da cinikayya, da aiwatar da tsare-tsaren rage haraji daidai-wa-daida, da kuma kafa majalisun cinikayya da zuba jari, kana sun cimma wasu matsaya da dama. Kazalika, bangarorin biyu sun kuma tattauna a karon farko game da fasahar kirkirarriyar basira ta AI a karkashin tsarin tattaunawar tattalin arziki da cinikayyar Sin da Amurka.   A zahiri, bisa jagorancin da shugabannin kasashen Sin da Amurka suke yi, cudanya da mu'ammalar kasashen 2 sun nuna wani yanayi mai gamsarwa, wanda yake cike da sahihanci, da niyyar tabbatar da makoma mai haske. Wannan yanayi ya shaida gaskiyar maganar da Elijah Mwangi, shahararren masanin ilimin harkokin siyasa, ya fada dangane da huldar dake tsakanin kasashen Sin da Amurka, inda ya ce, yayin da ake kula da huldar manyan kasashe, ba dole ne a dinga cin moriya da faduwar wani ba, kuma za a iya takara da hadin gwiwa da juna a lokaci guda.  Alal hakika, cudanyar da ake yi tsakanin shugabannin manyan kasashe na Sin da Amurka ta samar da karin tabbaci ga yanayin siyasa da na tattalin arziki na duniya, wadda ke haifar da alfanu ga bangarorin Sin da Amurka, gami da dukkan kasashen duniya gaba daya. (Bello Wang) 

Shirye-shirye sun kammala na watsa shagalin bikin tsakiyar kaka na kafar CMG na shekarar nan ta 2026. An tsara watsa...

Mai dakin shugaban kasar Sin Peng Liyuan, da uwargidan shugaban Amurka Melania Trump, sun ziyarci gidan adana kayan tarihi na kayayyakin nahiyar Asiya wanda ke birnin Washington a ranar Alhamis.  Peng da Melania, sun ziyarci sassan babban zauren nune-nune dake gidan, ciki har da dakin “Peacock”. Uwargida Peng ta jinjinawa bangaren Amurka bisa yadda a lokuta daban daban ya rika mayar wa Sin kayayyakin tarihi cikin shekarun baya bayan nan, tana mai fatan Sin da Amurka za su ci gaba da karfafa hadin gwiwa a fannonin musayar al’adu, da kare abubuwan al’adu da aka gada daga kaka da kakanni, da zurfafa abota tsakanin al’ummun sassan biyu.  Bayan kammala kewayen nasu, Peng da Melania sun kuma kalli yadda wasu matasa Amurkawa suka rera waka tare da harshen Sinanci, kana Peng ta yi kyakkyawar tattaunawa tare da matasan. Kazalika, ta karfafa musu gwiwar ci gaba da koyon harshe da al’adun Sinawa, kuma su zamo jakadun yaukaka kawance tsakanin Sin da Amurka.    (Saminu Alhassan) 

Shugaban kasar Sin Xi Jinping, da takwaransa na kasar Amurka Donald Trump, sun yi shawarwari a fadar White House da...

Shugaban kasar Sin Xi Jinping, ya bayyana aniyarsa ta yin aiki tare da takwaransa na Amurka Donald Trump, wajen sarrafa babbar alakar dake tsakanin Sin da Amurka kan turba mai dacewa da makomarsu ta nan gaba.  Shugaba Xi, wanda ya bayyana hakan a ranar Alhamis, cikin jawabin da ya gabatar bayan isarsa Amurka, yayin bikin tarba da shugaba Trump ya shirya masa a fadar White House, ya kuma yi kira game da bukatar karfafa tuntubar juna, da hadin gwiwa na hakika da kuma zama tare bisa jituwa.  Xi, ya kuma ce a wannan karo yana gudanar da ziyara ce ta kawance, da hadin gwiwa, da kuma fatan kyautata rayuwar daukacin al’ummun kasashen biyu.  Ya ce shi da takwaransa na Amurka na karfafa gwiwar hukumomin gwamnatocinsu, wadanda suka hada da masu nauyin gudanar da harkokin diflomasiyya, da tattalin arziki, da hadin gwiwar hada-hadar kudi, da na kare doka da musayar al’ummu, da su kara azamar karfafa tuntuba, da tallafawa majalisun dokokinsu a fannin yaukaka musaya da juna.  Da yammacin ranar Laraba ne shugaba Xi ya sauka a sansanin sojojin sama na Joint Base Andrews, domin fara ziyarar aiki ta yini uku a Amurka.  (SAMINU ALHASSAN) 

Hukumar kula da kayayyakin tarihi ta kasar Sin ta fitar da sabbin sakamako 3 na ayyukan binciken kayan tarihi a...

Yau 24 ga watan Satumba, ofishin yada labarai na majalisar gudanarwa ta kasar Sin ya gudanar da taron manema labarai bisa taken “fara aiwatar da shirin shekaru biyar-biyar karo na 15”.  A taron, wani jami’i mai kula da harkokin al’adu da yawon bude ido ya bayyana cewa, Sin ta zama kasa mafi yawan mutane da ake zuwa shakatawa daga kasashen waje da kuma babbar kasa mai karbar bakin yawon bude ido daga kasashen duniya.  A shekarar 2025, adadin masu shigowa kasar don yawon bude ido ya kai miliyan 154, wanda ya karu da kashi 17.1% idan an kwatanta da shekarar da ta gabata, adadin mazauna cikin kasar da suka tafi kasashen waje don yawon bude ido ya kai miliyan 148, wanda ya karu da kashi 20.8 % idan an kwatanta da shekarar da ta gabata.  A cewar bayanin, ci gaban harkokin yawon bude ido na Sin na dogaro da mabambantan albarkatu, kamar bambancin yanayin halitta da tarihi da al’adu. Bugu da kari, Sin ta gina tsarin hanyoyin jirgin kasa mai sauri mafi girma a duniya, da tsarin hanyoyin mota, kuma cibiyar sadarwar wayar hannu ta isa karkara da birane, wanda hakan ya tabbatar da karfin Sin a fannin ababen more rayuwa na yawon bude ido.(Amina Xu) 

A jiya Laraba 23 ga watan Satumba, wakilin din-din-din na kasar Sin a MDD, Fu Cong ya yi kira ga...

 A yayin taron manema labarai na yau da kullum da ma'aikatar kasuwanci ta kasar Sin ta gudanar da yinin yau, mai magana da yawun ma'aikatar, He Yadong, ya yi bayani kan batun da ya shafi zagaye na takwas na tattaunawar tattalin arziki da cinikayya, wadda tawagogin Sin da Amurka suka gudanar a birnin New York na kasar ta Amurka.  He Yadong ya gabatar da cewa, a kwanan nan, tawagogin tattalin arziki da kasuwanci na kasashen biyu sun gudanar da zagaye na takwas na tattaunawar tattalin arziki da cinikayya a Amurka. Bangarorin biyu sun yi shawarwari masu zurfi na gaskiya da gaskiya, kan batutuwan tattalin arziki da cinikayya da suka shafe su, kamar aiwatar da yarjejeniyar matsayar da aka cimma a tattaunawar tattalin arziki da cinikayya, da aiwatar da tsare-tsaren rage haraji daidai-wa-daida, da kuma kafa majalisun cinikayya da zuba jari, kana sun cimma wasu matsaya da dama.   Kazalika, bangarorin biyu sun kuma tattauna a karon farko game da fasahar kirkirarriyar basira ta AI a karkashin tsarin tattaunawar tattalin arziki da cinikayyar Sin da Amurka. (Mai Fassara: Abdulrazaq Yahuza Jere) 

A karkashin shawarar inganta ci gaban duniya ko GDI da kasar Sin ta gabatar, gwamnatin Sin ta gudanar da muhimman ayyukan hadin gwiwa sama da 2,000 tare da sassa daban daban, ayyukan da kai tsaye suka amfanar da al’ummu a sama da kasashe da yankunan duniya 120. Wadannan ayyuka sun samar da wani ginshiki na kaiwa ga cimma manufofin dake kunshe cikin ajadar MDD ta wanzar da ci gaba nan zuwa shekarar 2030.  Cikin wadannan shirye-shirye, a kusa da gida kasar Sin ta yi hadin gwiwa da asusun yara na majalisar dinkin duniya tare da larduna da dama na kasar Laos, wajen aiwatar da shirin samar da abinci mai gina jiki ga yara kanana. Karkashin hakan, an tanadi hidimomin tantance lafiya, da na jinya mai inganci, da kandagarkin cututtuka, matakan da suka ceto rayukan yara masu fama da karancin koshin lafiya.  Idan muka leka kasar Habasha ta shiyyar kahon Afirka, za mu tarar da cibiyar horar da sana’o’i ta Luban, wadda kasar Sin ta kaddamar a shekarar 2021, cibiyar da tuni kungiyar tarayyar Afirka ta AU ta jinjinawa, tare da bayyana ta a matsayin dandalin samar da kwarewa ga daukacin al’ummun Afirka. A cibiyar, ma’aikata da ake horar wa na samun dabaru da sanin makamar aiki, wadanda ke taimaka musu a fannin kara zamanantar da masana’antun kasashensu.  A yanzu haka, shawarar GDI, na kara samun karbuwa tsakanin sassan kasa da kasa. Inda tuni kasashe sama da 130, da hukumomin kasa da kasa suka bayyana amincewa da ita, tare da shiga hadin gwiwa da ita. A daya bangaren kuma, ta samu damar yin kawance da kusan abokan hulda 100, wadanda suka sanya hannu kan takardun yarjejeniyar hadin gwiwa na musamman na shiga ayyukan da kasar Sin ta tanada karkashin shawarar. Har ila yau, akwai wasu kasahe 88 da suka shiga rukunin kawance na shawarar ta GDI, yayin da tsarin aikin majalisar dinkin duniya mai nasaba da shawarar ya samu shigar hukumomin ingiza ci gaba guda 20.  Shawarar GDI ta dace da dadaddiyar manufar kasar Sin ta yin tafiya tare da dukkanin sassan duniya a fannin neman hanyoyin bunkasa ci gaba. Kuma mahukuntan kasar Sin sun sha alwashin ci gaba da aiwatar da matakai daban daban na ingiza ci gaban duniya, da aiki tare da dukkanin sassa, wajen karfafa karsashi da hadin kai, da nufin dinke dukkanin bangarori, ta yadda za a kai ga cimma karin moriyar bai daya ga dukkanin al’ummun duniya. (Saminu Alhassan)