Daga ranar 31 ga watan Agustan da muke ciki zuwa ranar 1 ga watan Satumba mai zuwa, za a gudanar da taron koli na kungiyar hadin gwiwa ta Shanghai (SCO) a kasar Kyrgyzstan. Kafin kaddamar da taron, wakilin CMG ya yi hira da babban magatakardan kungiyar, Nurlan Yermekbayev, wanda ya bayyana cewa, shawarar inganta jagorancin duniya da shugaban kasar Sin Xi Jinping ya gabatar tana da matukar ma’ana.
A cewar mista Yermekbayev, an jaddada bukatar samun daidaito tsakanin al’ummun duniya, da dora muhimmanci kan moriyar dan Adam, a cikin shawarar inganta jagorancin duniya. Kana a nata bangare, kungiyar SCO tana tsayawa kan yayata ra’ayin neman daidaito, da tattaunawa maimakon ja-in-ja, da girmama juna, da yarda da kasancewar mabambantan al’adu a duniya, da kokarin tabbatar da ci gaban tattalin arzikin kasashe daban daban na bai daya.
Ban da haka, mista Yermekbayev ya ambaci wata sanarwar da kungiyar SCO ta gabatar a watan Yulin bana, inda ya ce, dukkan mambobin kungiyar sun cimma matsaya daya ta adawa da matakin takunkumi na kashin kai, wanda ya zama keta kundin tsarin Majalissar Dinkin Duniya da ka’idojin kasa da kasa, da saba wa burin dan Adam na neman ci gaba mai dorewa. A cewarsa, yayin da ake tafiyar da al’amuran duniya, bai kamata a amince da matsawa wani lamba, da nuna fin karfi, da bayar da umarni ba. Maimakon haka, ya kamata a yi shawarwari, da daukar matakai na diflomasiyya da siyasa.Haka zalika, mista Yermekbayev ya yi tsokaci kan ci gaban da aka samu bisa hadin gwiwar mambobin kungiyar SCO. Ya ce, darajar cinikin da ake yi tsakaninsu na ta karuwa, inda jimillar ciniki ta shekarar da muke ciki ta riga ta zarce dala biliyan 700. Ban da haka, ana ta samun karuwa a fannonin zirga-zirgar mutane tsakanin mambobin kungiyar SCO, da adadin jigilar kayayyaki, da zuba jari, da amfani da kudin kasashen wajen gudanar da ciniki a tsakaninsu. (Bello Wang)
