Ministan babban birnin Tarayya (FCT), Nyesom Wike, ya bayyana cewa babu wani mutum a cikin jam’iyyar PDP da zai iya korar shi ko tambayar matsayin sa a jam’iyyar. A wata ganawa da manema labarai da aka yi a Abuja, Wike ya bayyana kansa a matsayin ɗaya daga cikin mambobin da suka fi kishin PDP, yana mai cewa babu wanda ya yi wa jam’iyyar hidima fiye da abin da ya bayar.
Wike ya mayar da martani kan wani jigo na jam’iyyar, Cif Bode George, dangane da batun rashin biyan harajin ƙasa a Abuja. Ya bayyana cewa Cif Bode George na daga cikin waɗanda aka soke takardun filayensu saboda rashin biyan kuɗi na tsawon shekaru goma, yana mai cewa bai dace mutum da irin wannan matsayi ya gaza biyan hakkin ƙasa ba.
- NLC Ta Yi Zanga-Zanga A Ofishin Wike, Ta Nemi A Biya Ma’aikatan Ƙananan Hukumomi Albashin N70,000
- Sulhun PDP Ya Haɗu Da Cikas, Wike Ya Janye Daga Duk Wata Yarjejeniya
Ministan ya kuma soki sakamakon da PDP ke samu a jihar Legas tun daga 1999, yana mai cewa jam’iyyar bata taɓa samun nasara ba a majalisun dokoki ko tarayya ba. Ya ce wannan yana nuna cewa ba jam’iyya ce ta gina mutum ba, sai dai mutum ne ke gina jam’iyyar ta hanyar aiki da ƙoƙari.
Ko da yake Wike har yanzu yana PDP, ya ce babban burinsa yanzu shi ne goyon bayan Gwamnatin Shugaba Bola Ahmed Tinubu. Ya bayyana cewa shi mutum ɗaya kawai yake biyayya masa a yanzu, wato Shugaban Ƙasa, kuma yana aiki don tallafa wa gwamnati domin kawo sauye-sauyen ci gaba.
A ƙarshe, Wike ya jaddada cewa ba za a iya fitar da shi daga PDP ba saboda irin gudummawar da ya bayar tun da farko. Ya ce yana jin daɗin faɗa da manya idan sun raina doka, yana mai cewa irin wannan halin na raina doka ne ke hana ƙasar ci gaba.
