Uwargidan Shugaban Ƙasa ta ƙaddamar da rabon fakitin audugar al’ada miliyan biyu da kayan karatu ga ɗalibai mata a faɗin Nijeriya.
Uwargidan Shugaban Ƙasa, Sanata Oluremi Tinubu, ta ce bai kamata yara mata su rasa zuwa makaranta saboda rashin kuɗin sayen audugar al’ada ko wasu matsalolin kuɗi ba.
Ta bayyana hakan ne a Abuja, yayin ƙaddamar da shirin ‘Flow with Confidence 2.0,’ wanda Hukumar Kula da Ilimin Firamare da Ƙananan Makarantu ta Ƙasa (UBEC) ke aiwatarwa, domin tallafa wa ɗalibai mata a makarantun gwamnati a faɗin jihohi 36 da Babban Birnin Tarayya.
A ƙarƙashin shirin, za a raba fakitin audugar al’ada miliyan biyu tare da jakunkunan makaranta, takalma, littattafan rubutu da sauran kayan karatu domin taimaka wa ’yan mata ci gaba da karatunsu cikin kwarin gwiwa da mutunci.
Tinubu ta kuma sanar da shirin tallafa wa ɗalibai mai kuɗin Naira biliyan biyu, wanda zai tallafa wa ɗalibai 100,000, inda kowannensu zai samu Naira 20,000 domin rage matsalolin kuɗi da ke hana su zuwa makaranta.
A nasa ɓangaren, Ministan Ilimi, Dakta Tunji Alausa, ya ce UBEC za ta riƙa ware kuɗi a kasafin kuɗinta na shekara-shekara domin samar da audugar al’ada ga ɗalibai mata, yayin da shirin AGILE da Bankin Duniya ke tallafawa zai ci gaba da bayar da gudummawa.
Sakatariyar Zartarwa ta UBEC, Aisha Garba, ta ce za a faɗaɗa shirin domin ƙarin ɗalibai mata su amfana, yayin da ta jaddada muhimmancin kawar da matsalolin da ke hana ’yan mata samun ilimi.
Shugaban Hukumar Gudanarwa ta UBEC, Tanko Al-Makura, ya ce shirin zai taimaka wajen rage yawan ’yan matan da ke barin makaranta, tare da rage haɗarin auren wuri.
Haka kuma, mahalarta taron sun yi kira ga iyaye, shugabannin gargajiya da na addinai da su taimaka wajen kawar da kyama da rashin fahimta game da al’adar mata, tare da ƙarfafa iyaye su ba ’ya’yansu mata damar samun ilimi.
