BangarMataimakin wakilin dindindin na kasar Sin a MDD Sun Lei ya bayyana a jiya Litinin, yayin da kwamitin sulhu ke nazari kan batun Ukraine, cewar rikicin Ukraine yana da alaka da al’amura masu yawa, kuma cimma yarjejeniyar zaman lafiya ba abu ne mai sauki ba.
Kana har yanzu akwai doguwar tafiya a neman mafita ta siyasa, inda hakan ke bukatar yin iyakacin kokari daga dukkan bangarori ba tare da gajiyawa ba.
Sun Lei ya ce, rikicin Ukraine yana ci gaba da ruruwa, amma abin da ake da tabbaci a kai shi ne, matakan soji ba za su kawo zaman lafiya ba, kuma rikici ba iyaka zai haifar da mummunar barna ne kawai.
Sun Lei ya gabatar da shawarwari guda 4, dangane da halin da ake ciki, wato da farko bangarorin da abin ya shafa su mayar da al’umma gaban komai, da nuna matukar hakuri. Na biyu kuma dukkan bangarorin da abin ya shafa su gaggauta komawa ga tsarin tattaunawar zaman lafiya, don cimma cikakkiyar yarjejeniyar zaman lafiya mai dorewa wadda dole za su martaba. Na uku kuma, kasashen yankin, da al’ummun kasa da kasa su fitar da karin muryoyi masu ma’ana don tsagaita wuta da dakatar da yaki, da karfafa tattaunawa, da cimma zaman lafiya. Na karshe kuma, dukkan bangarorin da abin ya shafa su kafa karfafa tsarin tsaron yankinsu bisa daidaito, da inganci da dorewa.
Sun Lei ya jaddada cewa, game da batun Ukraine bangaren Sin ya kasance kan matsayi na daidaito da gaskiya. Bangaren Sin zai ci gaba da hadin gwiwa da al’ummun kasa da kasa, don taka rawar gani wajen cimma mafita ta siyasa a rikicin. (Amina Xu)
