Sakamakon rubanya dabarun neman fada-a-ji ta fuskar siyasar yankunan duniya, da kawo cikas ga manyan hanyoyin jigila ta ruwa da karuwar kariyar cinikayya, tsarin masana’antun duniya na fuskantar rashin tabbas da ba a taba gani ba. A bisa hakan ne, bikin baje kolin tsarin samar da kayayyaki na duniya na kasar Sin (CISCE) ya jawo hankalin duniya baki daya.
Wata kuri’ar jin ra’ayoyin jama’a ta shafin intanet da CGTN ta fitar da sakamakonta ta nuna cewa, kashi 79.5% na wadanda suka amsa tambayoyi sun yi tsokaci sosai kan irin gudunmawar da kasar Sin ke bayarwa wajen bunkasa tattalin arzikin duniya mai bude kofa, tare da amannar cewa, kasar Sin ta kasance mai karewa da kuma gina masana’antu da tsarin samar da kayayyaki a duniya.
Yayin da kashi 80.1% na masu amsa tambayoyin suka yi imanin cewa, a matsayin bikin baje koli na duniya a matakin kasa mai taken hadin gwiwar tsarin samar da kayayyaki, CISCE zai kara inganta hadewa da juna da hadin gwiwa mai zurfi a bangaren masana’antu da kuma tsarin samar da kayayyaki na duniya.
An gudanar da kuri’ar ce a dandalolin CGTN na Turanci, da Spaniyanci, da Faransanci, da Larabci, da kuma Rashanci, inda jimlar masu amsa tambayoyi 4,753 suka bayyana ra’ayoyinsu cikin sa’o’i 24. (Mai fassara: Abdulrazaq Yahuza Jere)
