An rufe bikin baje kolin kayayyakin amfanin jama’+a na kasa da kasa na kasar Sin karo na 6 jiya Asabar.
A matsayin wani dandali na duniya na nunawa da cinikin kayayyakin masu inganci, wadanne sabbin hanyoyin sayen abubuwa bikin baje kolin na wannan karo ya haifar? Daga kayayyakin amfanin jama’a masu kiyaye muhalli, zuwa fasahohin zamani kamar gilashin AI da motoci masu tashi sama, ana iya samun hanyoyin sayen abubuwa masu kiyaye muhalli na zamani a ko ina a bikin baje kolin, a sa’i daya kuma, “tattalin arzikin ba da hidimomi” ya zama sabon salo ga masu sayayya.
Ban da haka kuma, wadanne sabbin damammaki ne farfadowar kasuwar sayen kayayyaki ta Sin za ta kawo wa kamfanonin kasashen waje?Na farko, yayin da ingancin rayuwar mutanen Sin ke kara kyautata, kasuwa tana fadada yadda ya kamata. A lokaci guda, sauyin bukatar Sinawa zuwa ga “sabbin” kayayyaki yana habaka kirkire-kirkire na kamfanoni. Abu mafi mahimmanci shi ne, bude babbar kofa da kuma ci gaba da rage shingayen shiga kasar da Sin ta yi, sun bude “sabbin hanyoyi” ga kamfanonin kasashen waje.
Tun daga fadada wuraren gwaji na masana’antar ba da hidima zuwa kara yankunan ciniki cikin ’yanci zuwa 23, “taswirar bude kofa” ta Sin tana kara bayyana.Bugu da kari, a ranar 15 ga wata, aka bude bikin baje kolin kayayyakin shige da fice na kasa da kasa na Sin wato Canton Fair karo na 139 a birnin Guangzhou.
Bisa nune nunen kayayyaki daya bayan daya, Sin ta ci gaba da habaka bude kofarta. A matsayinsu na masu ruwa da tsaki yayin zamanantar da kasar Sin, kamfanoni masu zuba jari daga kasashen waje za su yi aiki tare da Sin don samar da kyakkyawar makoma.(Safiyah Ma)
