A gabar da fasahar AI ke sauya yadda ake samar da bayanai, da rarrabawa da cin gajiyarsu, jagororin sassan kafofin watsa bayanai, da masu tsara manufofi, da masu kirkire-kirkiren fasahohi, da masana daga sassa daban daban na duniya, za su taru a birnin Chongqing na kudu maso yammacin kasar Sin a ranar Laraba 10 ga watan nan, domin halartar dandalin CMG karo na 5.
Ana sa ran dandalin wanda rukunin gidajen radio da talabijin na kasar Sin CMG ya shirya, da hadin gwiwar gwamnatin birnin Chongqing, zai hallara kusan wakilai 300 daga sassan duniya, don nazartar yadda kafofin watsa bayanai za su ci gajiya daga karfin fasahohin kirkire-kirkire, yayin da kuma suke sauke nauyin dake wuyansu na fadakarwa, da hade sassa daban daban da kuma karfafa gwiwa.
A bana dandalin zai gudana ne karkashin jigon “Kariya da saitawa: Kudurin kafofin watsa bayanai a karnin basira”. Kazalika, dandalin zai samar da dama ta gudanar da shawarwari tsakanin sassan masana’antu da kan iyakoki.
Bugu da kari, karkashin bayanan bude dandalin, za a gudanar da tattaunawa a rukunoni daban daban, da nune-nunen ayyuka na hakika, kana mahalartansa za su yi musayar batutuwa dangane da sabbin fasahohi, da al’adu da ma makomar salon sadarwa na duniya.
A daya bangaren kuma, za su nazarci yadda kafofin watsa bayanai za su iya bayar da gudunmawa ga tsari mai game dukkanin sassa, bisa gaskiya da karsashi, a lokacin da ake tsaka da bullar fasahohi masu kunshe da basira. (Saminu Alhassan)
