DSS ta tabbatar da kama Zainab Sodiq, ‘yar jaridar da ke bibiyar ayyukan ɗan siyasa Omoyele Sowore, bisa zargin mallakar jirgi maras matuki (drone) ba tare da takardun da doka ta tanada ba. A wata sanarwa da Mataimakin Daraktan Hulɗa da Jama’a da Sadarwa ta DSS, Favour Dozie, ya fitar ranar Alhamis, ya ce jami’an DSS tare da na Tsaron Sufurin Jiragen Sama (AVSEC) sun tare ta ne a Filin Jirgin Sama na Murtala Muhammed da ke Legas a ranar 6 ga Yuli.
Sanarwar ta ce an same ta da jirgin sama mara matuƙi (UAV) yayin da take shirin tafiya Abuja, amma ba ta da Takardar Izinin Amfani (End User Certificate – EUC) da ake buƙata. DSS ta ce, bayan an tambaye ta, ta amsa cewa ba ta mallaki takardun da suka dace ba. Duk da haka, an ba ta damar ci gaba da tafiyarta zuwa Abuja saboda wani muhimmin alƙawari da take da shi, tare da umartar ta da ta kai kanta shalkwatar DSS a ranar 8 ga Yuli domin ci gaba da bincike.
Hukumar ta bayyana cewa binciken na gudana ne bisa ƙa’idojin da Mai Ba Shugaban Ƙasa Shawara Kan Harkokin Tsaro (NSA) ya kafa, waɗanda suka tanadi sharudda kan mallaka da amfani da jiragen sama marasa matuƙa. A cewar DSS, ƙa’idojin sun bai wa hukumar ikon ƙwacewa da hukunta duk wanda aka samu yana amfani da irin waɗannan jirage ba tare da amincewar hukuma ba, saboda matsalolin tsaro da suka haɗa da take sirri da kuma barazanar tsaron rayuka.
Sai dai da yake mayar da martani a shafinsa na X, Omoyele Sowore ya yi zargin cewa an tsare Zainab Sodiq ne saboda aikinta na jarida. Ya ce gwamnatin Shugaba Bola Tinubu na ƙoƙarin tsoratar da masu sukarsa, yana mai cewa kama ‘yar jaridar ba zai dakile aikinsu ba. Sai dai DSS ta dage cewa matakin da ta ɗauka ya yi daidai da dokokin tsaro da ke kula da amfani da jiragen sama marasa matuƙa a Najeriya.
