Muƙaddashin Babban Kwamishinan Nijeriya A Canada, Jakada Abba Zanna Kawu, ya bayyana cewa fiye da likitoci da lauyoyi, da sauran ƙwararru ƴan Nijeriya 600 ne ke aiki a faɗin Canada, lamarin da ke nuna ƙaruwar gudunmawar ƴan Nijeriya a cikin ma’aikatan ƙasar.
Ya bayyana cewa al’umma ƴan Nijeriya da ke Canada sun haɗa da likitoci da ƙwararrun likitanci fiye da 300, reshe mai ƙwazo na Cibiyar Akantoci ta Nijeriya (ICAN), da kuma lauyoyi fiye da 300 da ke aiki a faɗin ƙasar.
“Muna da ƙwararru a kusan kowane fannin rayuwa da ke ba da gudunmawa mai inganci ga ci gaban Canada,” in ji jakadan.
Kawu, wanda ya yi jawabi a wurin bikin shekara-shekara na Flaɓours of Nigeria Festiɓal da aka kammala kwanan nan a Gage Park da ke Brampton, ya bayyana cewa kusan ƴan Nijeriya 124,000 ne ke da zama a Canada a halin yanzu. Haka zalika, wasu ƴan Nijeriya 82,100 suna riƙe da bizar karatu mai aiki.
Ya alamta cewa ƴan Nijeriya na ci gaba da fice a fannoni daban-daban na sana’o’i, ciki har da likitanci, shari’a, da akanta, wanda hakan ke ƙara inganta martabar ƙasar a ƙasashen waje.
Kawu ya bayyana dangantakar da ke tsakanin Nijeriya da Canada a matsayin “kyakkyawa,” yana mai cewa dangantakar diplomasiyya da aka ƙulla daidai bayan samun ƴancin kai na Nijeriya a shekara ta 1962 tana ci gaba da haɓaka.
A cewarsa, yanzu haka Nijeriya ce abokiyar cinikayya ta biyu mafi girma da Canada ke da ita a Afrika.
Ya sake jaddada cewa ƴan Nijeriya a Canada sun haɗa da likitoci fiye da 300, na reshen ICAN, da lauyoyi fiye da 300. “Muna da ƙwararru a kusan kowane ɓangare da ke ba da gudunmawa mai amfani ga ci gaban Canada,” in ji shi.
