Gwamnan Jihar Zamfara, Dauda Lawal, ya yi alƙawarin ci gaba da ƙara ayyukan raya ƙasa domin inganta rayuwar al’ummar jihar.A ranar Alhamis ne gwamnan ya zama ɗan takarar jam’iyyar APC domin zaɓen gwamnan jihar Zamfara na shekarar 2027.
Wata sanarwa da mai magana da yawun gwamnan, Sulaiman Bala Idris, ya fitar ta bayyana cewa shugaban kwamitin zaɓen fidda gwani na gwamna na APC a Zamfara, Alhaji Babagana Uba, ya sanar da cewa an amince da Gwamna Dauda Lawal a matsayin ɗan takarar jam’iyyar baki ɗaya bayan samun ƙuri’u 301,893.
Sanarwar ta ƙara da cewa, an gudanar da amincewar ne a dukkan ƙananan hukumomi 14 na jihar Zamfara, tare da sa ido daga jami’an Hukumar Zaɓe Mai Zaman Kanta ta Ƙasa (INEC).
Sanarwar ta ce: “Kwamitin zaɓen fidda gwani na gwamnan jihar Zamfara ya ayyana Gwamna Dauda Lawal a matsayin ɗan takarar jam’iyyar APC shi kaɗai domin babban zaɓen shekarar 2027.
“Kwamitin ya karɓi sakamakon amincewa daga jami’an tattara sakamako na dukkan ƙananan hukumomi 14 na jihar, waɗanda Malam Abubakar Mohammed Nakwada, shugaban tattara sakamako na APC a jihar, tare da sauran mambobin tawagar tattara sakamako suka sanya wa hannu.”
Shugaban kwamitin ya kuma bayyana sakamakon amincewar da aka samu daga ƙananan hukumomi daban-daban kamar haka: Anka 16,607; Bakura 18,112; Birnin Magaji 15,440; Bukkuyum 11,406; Bungudu 24,406; Gummi 23,024; Gusau 61,072; Kaura Namoda 18,315; Maradun 15,624; Maru 17,341; Shinkafi 15,204; Talata Mafara 22,884; Tsafe 19,354; da Zurmi 22,506.Da yake jawabi bayan ayyana shi a matsayin ɗan takara, Gwamna Dauda Lawal ya gode wa al’ummar Zamfara bisa amincewa da goyon bayan da suka nuna masa.
Ya ce, gwamnatinsa za ta ci gaba da aiwatar da ayyukan raya ƙasa a fannoni daban-daban da suka haɗa da ilimi, lafiya, ababen more rayuwa da tattalin arziki.
“A yau rana ce mai tarihi a siyasar jihar Zamfara, domin dukkan manyan masu ruwa da tsaki sun haɗu ƙarƙashin inuwa ɗaya cikin haɗin kai,” in ji gwamnan.
“Da aka ayyana ni a matsayin ɗan takarar jam’iyyarmu ta APC, ina godiya ga dukkan mambobin jam’iyya da al’ummar jihar bisa amincewar da suka yi da gwamnatina.
“Wannan gagarumin goyon baya da soyayya da aka nuna mini zai ƙara ƙarfafa mini gwiwa wajen ci gaba da ƙoƙarin ceto da sake gina jihar Zamfara.
“Ina kuma godiya ga shugaban kwamitin zaɓen fidda gwani da sauran mambobinsa da suka tabbatar da gudanar da zaɓen cikin nasara a jihar Zamfara.”
