Gwamnan jihar Katsina, Malam Dikko Umar Raɗɗa ya taya shugaban kungiyar ‘yan jaridu, NUJ ta ƙasa reshen jihar Katsina, Tukur Dan Ali murnar zama shugaba mafi kwazo a shiyyar arewa maso yamma.
An dai bayyana Kwamarad Tukur Dan Ali a matsayin shugaban da yafi kowane kwazo a yankin arewa maso yamma wajen hidimar aikin jarida da kuma ‘yan jaridu.
- Yankin Arewa Ta Tsakiya Ya Fi Kowacce Shiyya Tsadar Farashin Man Dizal ₦1205.11 – NBS
- ‘Yan Nijeriya Ku Ba Wa Tinubu Ƙarin Lokaci Zai Magance Matsalolin Nijeriya – Gowon
Shugaban kungiyar ‘yan jaridu ta ƙasa mista Chris Isiguzo ne ya bayyana cewa Kwamarad Tukur Dan Ali ne shugaba mafi kwazo a wannan yanki a lokacin taron zartawar na kungiyar da aka gudanar a Abuja jiya Laraba.
Kamar yadda gwamna Malam Dikko Umar Raɗɗa ya bayyana a cikin wata sanarwa da mai taimaka masa a ɓangaren yaɗa labarai Ibrahim Kaula ya fitar tana cewa Kwamarad Tukur Dan Ali ya cancanci samun wannan ƙarramawa duba da irin salon shugabancin da yake yi wa kungiyar a jihar Katsina
“Muna masu alfahari da kasancewa tare da Kwamarad Tukur Dan Ali tare da bada misalin salon shugabancin sa a kungiyar ‘yan jaridu ta ƙasa reshen jihar Katsina ” inji Gwamna Dikko Raɗɗa
Ya ƙara da cewa wannan ƙarramawa an ɗora ƙwarya a gurbin ta saboda haka yana taya shi murnar da iyalansa da kuma ‘yan jaridu na jihar Katsina baƙi ɗaya
