Gwamna Caleb Mutfwang na Jihar Filato ya sallami mambobi biyar na majalisar zartarwarsa.
Gwamnan ya bayyana hakan ne cikin wata sanarwa da Sakataren Gwamnatin Jiha Samuel Jatau, ya fitar, amma bai bayyana dalilin korar su ba.
- Fannonin Da Xi Jinping Ya Lura Da Su A Ziyararsa A Arewa Maso Gabashin Sin
- Gwamnan Bauchi Ya Rantsar Da Mashawarta 11, Ya Horesu Da Aiki Tuƙuru
Waɗanda da abin ya shafa sun haɗa da Chrysanthus Dawam, kwamishinan Tsare-tsare da Tattalin Arziki, da Noel Nkup, kwamishinan Matasa da Wasanni, da Jamila Tukur, kwamishinar Yawon Buɗe Ido da Yawon Shakatawa, sai kuma Obed Goselle kwamishinan Kimiyya da Fasaha, da Sule Musa, kwamishinan Kasuwanci da Masana’antu.
Kazalika gwamnan ya amince da naɗa Sunday Alex daga Ƙaramar Hukumar Bassa, da Joyce Ramnap daga Langtang ta Kudu, da Sylvanus Dongtoe daga Shendam, da kuma Nicholas Baamlong daga Qua’an Pam, sai Cornelius Doeyok daga Ƙaramar Hukumar Qua’an domin maye gurbin waɗanda ya sallama.
Idan ba a manta ba a baya ma gwamnan ya dakatar da Dawam da Jamila na watanni uku bisa wasu dalilai da ba a bayyana ba, wanda a yanzu majiyoyi ke cewa sallmar tasu na da alaƙa da rashin aiki yadda ya kamata a shekarar da ta gabata.
Wannan ya janyo cece-kuce a cikin harkokin siyasa, inda masana ke hasashen yiwuwar sauya wasu mukamai da kuma tasirin sauyin a harkokin gwamnati.
